Buxoroda 7 nafar mahkum muddatidan avval ozod etildi
2020 yil 27 aprel kuni jinoyat ishlari bo‘yicha Peshko‘ tuman sudida (sud raisi F.Ikramov) tegishli xavfsizlik choralari ko‘rilib, karantin qoidalariga rioya etilgan holda, Peshko‘ tuman IIO Probasiya guruhi tomonidan keltirilgan sud hukmi bilan jazo o‘tayotgan 7 nafar mahkumlarning jazosini o‘tashidan muddatidan ilgari shartli ozod qilish haqidagi taqdimnomalar ko‘rib chiqildi.
Tuman sudi tomonidan O‘zbekiston Respublikasi jinoyat qonunining insonparvarlik prinsipiga amal qilinib, jazoni o‘tash tartib-qoidalarini bajargan va mehnatga halol munosabatda bo‘lgan 7 nafar axloq tuzatish va ozodlikni cheklash jazolarini o‘tayotgan mahkumlar ya’ni Esanov Burhoniddin Erkin o‘g‘li, Jabborov Dilmurod Mansurovich, Raximov Asror Xalilovich, Baridinov Muhriddin Shamsiddin o‘g‘li, Xolov Ozod Xudoyberdiyevich, Narzullayev Shermat Sharopovich va Asrorov Bahodir To‘lqinovichlarni O‘zbekiston Respublikasi Jinoyat kodeksining
73-moddasiga asosan jazoning o‘talmagan qismidan muddatidan ilgari shartli ozod qilindilar.
Kechirimlilik xalqimizga xos fazilat. Davlatimiz tomonidan yo‘ldan adashganlarga imkon berib, jinoyat sodir etgan shaxslarga sodir etgan jinoyatining ijtimoiy xavfliligini tushunib yetishiga, tuzalish yo‘liga kirib, jamiyatga nafi tegadigan inson bo‘lib qaytishiga keng imkoniyatlar yaratib berilmoqda.
F. Ikramov, Jinoyat ishlari bo‘yicha
Peshko‘ tuman sudi raisi
