Морхўр боласи асраб қолинди

Сурхондарё вилоятидаги Кўҳитанг тоғ тизмаларида ёққан кучли ёмғир туғилганига тахминан икки-уч кун бўлган Ўзбекистон Республикаси “Қизил китоби”га киритилган морхўр боласини онасидан ажратиб ташлайди.

“Сурхон” давлат қўриқхонаси “Қизилолма” бўлимини кўздан кечираётган назоратчи Тоғаймурод Абдулалиев сойда ночор аҳволда унга дуч келиб, биринчи ёрдам кўрсатади, морхўр боласининг ҳаётини сақлаб қолади.

Экология, атроф-муҳит муҳофазаси ва иқлим ўзгариши бошқармаси ахборот хизматининг хабар қилишича, кучли ёмғирда онасидан ажралиб қолган морхўр боласи зудлик билан ветеринар кўригидан ўтказилиб, тегишли ҳужжатлар расмийлаштирилгач, Бухоро ихтисослаштирилган Жайрон питомнигига парвариш қилиш учун жўнатилган.

Маълумотларга кўра, айни пайтда вилоятдаги “Сурхон” давлат қўриқхонасида 700 бошдан ортиқ морхўр мавжуд.