Ҳиндистонда фармацевтика компаниялари вакиллари билан музокаралар ўтказилмоқда

Фармацевтика тармоғини ривожлантириш агентлиги директори Абдулла Азизов бошчилигидаги делегация амалий ташриф билан Ҳиндистонда бўлиб турибди. Делегация таркибидан Бухоро вилояти ҳокимлиги ҳамда фармацевтика маҳсулотларини ишлаб чиқаришга ихтисослашган қатор компаниялар вакиллари ўрин олган.

Ташриф дастурига кўра, делегация аъзолари Ҳиндистон Кимё саноати ва ўғитлар вазири ўринбосари – Фармацевтика агентлиги директори билан музокаралар ўтказиб, ўзаро манфаатли ҳамкорлик алоқаларини янада ривожлантириш истиқболларини муҳокама қилди. Агентлик директори учрашув давомида «Tashkent Pharma Park» инновацион илмий ишлаб чиқариш фармацевтика кластери ҳақида батафсил маълумот берди.

Шунингдек, мамлакатимизнинг Деҳлидаги элчихонасида "Global India Business Forum" жамғармаси билан ҳамкорликда уюштирилган давра суҳбатида икки мамлакат фармацевтика мутахассислари янги ҳамкорлик лойиҳаларини муҳокама қилди.

Ўзбекистон делегацияси аъзолари ташриф доирасида Телангана ва Гужарат штатларида ҳам бўлади. Унда мамлакатимизнинг ушбу йўналишдаги бой салоҳиятини тақдим қилиш ҳамда етакчи ишлаб чиқариш корхоналари фаолияти билан яқиндан танишиш режалаштирилган.

***

Шунингдек, Фармацевтика тармоғини ривожлантириш агентлигида Ливаннинг "Arwan Pharmaceuticals Industries Lebanon s.a.l." компанияси президенти билан учрашув ташкил этилди.

Mузокараларда компания директори Ўзбекистонда яратилган имкониятларни юқори баҳолаб, истиқболли инвестиция лойиҳаларини, жумладан, биотехнология йўналишида амалга ошириш бўйича ўз фикр ва режаларини тақдим этди. Бу жараёнда улар мамлакатимизда зарур инфраструктура ва ишлаб чиқариш базасини яратиш учун мутахассисларни жалб қилишга алоҳида эътибор беришини таъкидлади.

Тадбир сўнгида, "Arwan Pharmaceuticals Industries Lebanon s.a.l.” компанияси Ўзбекистон билан яқин ҳамкорликни йўлга қўйишга тайёрлигини билдирди.