Россияда ётоқхонадаги ёнғинда 5 киши ҳалок бўлди

Россия пойтахти Москва яқинида Балашихадаги ётоқхонада ёнғин содир бўлди, 5 киши ҳалок бўлди, 3 киши қутқарилди.

Бу ҳақда ТАСС агентлигига таяниб, «Репорт» хабар бермоқда.

«Керамическая кўчасидаги ётоқхонада содир бўлган ёнғин натижасида 3 киши қутқариб қолинди, ҳозирда реанимация чоралари кўрилмоқда, 10 киши ҳудуддан эвакуация қилинди», — деди агентлик суҳбатдоши.

Россия Фавқулодда вазиятлар вазирлигининг Бош бошқармаси матбуот хизмати ёнғин фактини тасдиқлади. Унинг таъкидлашича, ёнғин 40 квадрат метр майдонни қамраб олган. Ёнғин ўчирилган.

Воқеа икки қаватли эски бинода содир бўлган.

Тезкор хизматлардан маълум қилинишича, ёнғинга электр тармоғининг аварияли ишлаши сабаб бўлган. Дастлабки маълумотларга кўра, бинода мигрантлар яшаган.