Фирибгарларнинг сеҳрли таёқчаси борми?
Нишон туманида яшовчи С. Норов(мақоладаги барча исм-фамилиялар ўзгартирилган) ўзганинг мол-мулкини фирибгарлик йўли билан қўлга киритишда устаси фаранглардан бўлиб чиқди.
Анойининг жайдари олмаси ҳар қўлда ўйнайди, деганларидек, у атай ўзини овсарликка соладики, ипдай эшилиб чўнтагингиздаги сўнгги чақани қуртдай санаб олганини ҳам сезмай қоласиз. Таниши Д.Тоҳировага тегишли бўлган тўрт бош йирик шохли қорамолни 35 миллион сўмга сотиб олишга келишиб, олдиндан ўн миллионини бериб, ишончига кириб олади. Ана энди қолган йигирма беш миллион сўмни ўз эҳтиёжларига бемалол ишлатаверади. Ўзи хон, кўланкаси майдон. Икки ой ичида ана шу суммани қайтаришга сўз берган кимсани тутиб бўпсиз. Бечора аёлнинг калиши унинг уйи остонасига қатнайвериб титилиб кетди.
Сафаралибой жиноий ҳаракатларини такроран давом эттириб, иссиқ из босилмасидан навбатдаги “мижоз”и Ш.Менглибоевнинг яшаш уйига бориб, янги ҳунарини ишга солиб унга тегишли бўлган она-бола сигирни 7.250.000 сўмга сотиб олади. Ва унинг қўлига 2.100.000 сўмни тутқазиб, қолганини икки ой ичида қайтаришга ваъда беради. Аммо ваъда унутилади, сигирини унга пуллаган мижоз алам доғида қоврилиб қолаверади. Сафаралибой унинг 5.150.000 сўмлик мол-мулкини фирибгарлик йўли билан қўлга киритганидан оёғи ер искамай янги мижоз қидиришга тушади. Қисқа фурсатда у Н. Холярованинг икки бош йирик қорамолини алдов йўли билан сотиб олиб, унга яна бериши мумкин бўлган ўн миллион сўмни ўзлаштириб кетади.
Бундан ташқари, С.Норов жиноий ҳаракатларини такроран давом эттириб, Р.Сафаров ва Д. Маматқуловнинг яшаш уйига бориб, бирининг бир бош йирик шохли қорамолини 11.500.000 сўмга сотиб олишга келишиб, бор- йўғи бир миллион сўм пул тўлаб, 10.500.000 сўм пулларни қайтаришни унутади. Д. Маматқуловга ҳам эски ҳунарини ишга солиб, арзимас пул тўлаб, саккиз миллион сўмни қайтармай фирибгарликка такроран қўл уради.
Муборак туманида яшовчи Аҳмаджон Удаевнинг ҳийласи тулкиникидан ўтади. Баҳор келиши билан одамлар ўз қорамоғидаги чорва молларини боқиш учун чўпон қидиришга тушади. Ана энди Аҳмаджон ўзини чўпон кўрсатиб, ҳар майда чорва молига ойига 20 минг сўмдан олишини айтиб, мижозларни чорлайди. Илк бор унинг тўрига Н.Турсунова илинади. Унинг 10 бош (жами 17.000.000 сўмлик) қўйини дала майдонларида боқиб беришга ишонтиради. Ҳар ой 10 бош қўй учун 200.000 сўмдан нақд чўпон пули олиб туради. Қўйларни эса аллақачон сотиб юборади. Аммо 2022 йилнинг март ойи бошидан 2024 йилнинг январь ойига қадар мижозига қўйларини боқиб юрганлигини айтиб, ундан “иш ҳақи” учун 4.400.000 сўм пулни қуртдай санаб олади. Н.Турсунова қўйларидан хабар олгани келганида чув тушганлигини билиб қолади. Уддабурон Аҳмаджон унинг қўйларини гум қилиб, “иш ҳақи”ни уялмай олиб, унинг жами 21.400.000 сўмлик мол-мулкини фирибгарлик йўли билан қўлга киритган бўлади.
А.Удаев шу “усул” билан фуқаро А. Боймуродовнинг 6 бош эчкиси учун 6.840.000, О.Беккиевнинг 14.610.000, М.Рўзиевнинг 4.550.000 А.Саломатовнинг 10.750.000, С.Чўллиевнинг 12.900.000 сўмлик мол-мулкини фирибгарлик йўли билан ўзлаштирган.
Одамзотнинг ёмон қилиғи унинг шаън-обрўсини бадном этади. Шайтон тўрига илинган кимса инқирозини нафс илонининг бадхуллигидан изласин. Фирибгарлар бугунги кунда нега кўпаймоқда? Халқимизнинг соддадиллиги ва саховатпешалиги уларнинг урчишига ва ҳар жойда кенг томир отишига сабаб бўлмаяптимикан? Тилини икки қулоч осилтириб, товонингизни ялашга шай турган кимсаларнинг гоҳ у маҳаллада, гоҳ бу маҳаллада пайдо бўлаётганлигидан нега сергак тортмаймиз. Гоҳида электр токи ёки газ пулини йиғиш мақсадида эшигингизни қоқаётган кимсалар ҳам йўқ эмас. Улар соддадил кишилар эшиги остонасида пайдо бўлиб, уларни элакка солиб элашади. Баъзида ишонувчанлик қаттиқ панд берганлигини чув тушгандан сўнг тушуниб етамиз. Пул теришга келган назоратчиларнинг қайси идорадан эканлигини маҳалла фуқаролар йиғини фаоллари ёки уйбошилар билиши шарт. Ана шунда турли қиёфадаги товламачилар уйингиз эшигини қоқмоққа жуърат қилолмайди. Қўлингизга қалбаки патта тутиб, юз яширишга улгуролмайди. Сизни алдамоқчи бўлган “алдаркўса”нинг ўзи алданади.
Аммо биз ҳушёрмизми? Барча-барчани огоҳлантиргинг келади. Сизга бирон амал курсисини ваъда қилган ёхуд фарзандингизни ишга жойлаштириш, ўқишга киритиш тўғрисида томдан тараша тушгандай гап қотган кимсанинг имо-ишорасидан шубҳаланинг. Олифта йигитнинг чўпчагидан гангиб, шаҳар берворманг. Унинг шахси, амали билан қизиқинг. Шунда фирибгар қаршисида оғзидагини елга учирмайдиган мижоз турганлигидан ҳайиқади. Иккинчи бир кишининг ҳушёрлигидан баттар тушовланади. Ёлғонга эрк бериб, чилдирма чалаолмайди. Фирибгарнинг сеҳрли таёқчасини ана шу тахлитда қўлидан туширишингиз мумкин. Сизнинг гўллигингиз унинг сеҳру жодусига қанот бахш этишини асло унутманг.
