Коррупциясиз банк – энг бирламчи вазифа

Маълумки, Ўзбекистон Республикаси Президентининг 2021 йил 6 июлдаги «Коррупцияга қарши курашиш фаолиятини самарали ташкил этишга доир қўшимча чора-тадбирлар тўғрисида»ги ПҚ-5177-сонли Қарори ижросига мувофиқ Микрокредитбанк тизимида ҳам Коррупцияга қарши назорат департаменти ташкил этилган.
Мазкур департамент томонидан банк тизимида коррупциянинг олдини олишга қаратилган барча зарурий чораларни кўришга қаратилган кенг кўламли ишлар амалга оширилмоқда.
Жумладан, коррупцияга қарши ички назорат тузилмалари ташкил этилиб, уларнинг ваколат ва ҳуқуқлари, шунингдек, банкнинг бошқа бўлинмалари билан биргаликдаги ҳамкорлиги ички меъёрий ҳужжатлар билан аниқ белгилаб қўйилган.
Бундан ташқари, мавжуд бўш иш ўринларига номзодларни очиқ танлов асосида ишга қабул қилиш амалиёти йўлга қўйилди, банк эҳтиёжлари учун харидларни шаффоф тизим орқали амалга ошириш, ушбу жараёнда коррупциявий хатарларни аниқлаш ва бартараф этиш амалиётлари жорий қилинди.
Таъкидлаш керакки, банк фаолиятида коррупция ҳолатларнинг юзага келиш эҳтимоли юқори бўлган кредитлаш амалиётларида, аҳоли ва тадбиркорлик субъектларига кўрсатилаётган банк хизматларини рақамлаштириш орқали инсон омилини камайтириш энг устувор вазифа қилиб белгиланган.
Юқоридаги ишларимизнинг самараси ўлароқ Коррупцияга қарши курашиш агентлиги маълумотларига кўра, «Микрокредитбанк» АТБ 95 та давлат ташкилоти орасида коррупцияга қарши курашиш ишларининг самарадорлигини баҳолаш рейтинг натижаларига асосан 84 балл билан яшил рейтингда яхши кўрсаткичга эга бўлди. Бунда, коррупцияга қарши курашиш ишларининг самарадорлигини рейтинг баҳолаш тизими бўйича давлат органлари ва ташкилотлари, шу жумладан, маҳаллий ижро этувчи ҳокимият органларининг 2023 йил давомидаги фаолиятида коррупцияга қарши курашиш механизмлари қай даражада самарали амалга оширилгани баҳоланди.
Шу билан бирга жорий йилда банкда коррупцияга қарши курашиш тизими бўйича ISO 37001:2016 халқаро сертификатини олиш режалаштирилган. Бугунги кунда масъул консультантлар ҳамда сертификатлаштирувчи ташкилотлар билан банкнинг коррупцияга қарши курашиш тизими ва халқаро стандартлар талабларига мувофиқлигини ҳар томонлама ўрганиш ишлари олиб борилмоқда.
Мазкур вазифалар доирасида банкнинг коррупцияга қарши назорат тизими таҳлили ўтказилди, ички ва ташқи омиллар аниқланди, натижада коррупцияга қарши курашиш реэстрлари, манфаатдор шахсларнинг коррупцияга қарши банкка бўлган талаб ва истаклари ҳамда коррупция хавфлари шакллантирилди.
Коррупцияга қарши ўқитиш ишларига мувофиқ 2024 йил учун ходимларнинг ҳуқуқий онгини ошириш мақсадида режа-график ишлаб чиқилган бўлиб, унга асосан банкнинг Бош офиси ва ҳудудий бўлинма ходимлари иштирокида ҳуқуқни муҳофаза қилувчи органлари, Коррупцияга қарши курашиш агентлиги масъул ходимлари ҳамда Адлия вазирлиги ҳузуридаги Юристларнинг малакасини ошириш маркази мутахассисларини жалб қилган ҳолда Ўзбекистон Республикаси Президенти қарорлари ва фармонлари ижросини таъминлаш, шунингдек, «Банк тизимида коррупцияга қарши курашишнинг ҳуқуқий асослари», «Коррупция — тараққиёт кушандаси», «Манфаатлар тўқнашувининг олдини олиш» ва «Банк сири тўғрисидаги қонун мазмун-моҳияти» мавзуларида семинар-тренинглар ҳамда давра суҳбатлари ўтказиб келинмоқда.
Маълумот ўрнида шуни айтиб ўтиш жоизки, ходимларнинг малакасини ошириш ва уларга коррупцияга нисбатан муросасиз муносабатни шакиллантириш учун Банкнинг коррупцияга қарши курашиш тизимига халқаро стандартларни жорий қилиш мақсадида, 89 нафар банк ходимлари халқаро тренинг марказида ISO 37001:2016 «Коррупцияга қарши курашни бошқариш тизими — талаблар ва қўллаш бўйича кўрсатмалар» бўйича ўқитилди ва улар халқаро сертификатларга эга бўлишди.
Бундан ташқари, банкда ходимларни индивидуал оъқитиш ва уларнинг ҳуқуқий онгини ривожлантириш мақсадида банкнинг «MKB Training» платформасида «Антикоррупция 2023», «Банкда коррупцияга қарши курашиш» ҳамда «Коррупционер ким?» мавзуларида ташкил этилган ўқув курсларида интерактив викторина, видео дарслар ва тестлар орқали ходимларда коррупцияга нисбатан муросасизликни шакллантириш ишлари олиб борилмоқда.

Банк тизимида коррупцияга қарши курашиш йўналишида эътиборга молик ишлардан яна бири, мижозларга хизмат кўрсатишда очиқлик ва шаффофликни таъминлаш, бу борада жамоатчилик билан самарали алоқани йўлга қўйиш мақсадида 4 та алоқа канали ташкил этилган.
Яъни ишонч телефони: +998 55 503-77-11, телеграм БОТ: mkbanticor_bot, электрон почта: mkbanticor@mkb.uz, расмий веб-сайт: www.mkbank.uz Антикоррупция саҳифаси орқали мижозлардан ва фуқаролардан банк тизимидаги бевосита қонун бузилиш ҳолатлари вужудга келганда мурожаатларини шахсни ошкор қилган ҳолда ёки аноним тарзда юборишлари мумкин.
Шунингдек, мижозларга осон боълиши учун банкнинг веб-сайти ва телеграм ботига мурожаат қолдириш видео-йўриқномаси тайёрланган. Бу йўриқнома банкнинг мижозларни кутиш зали ва электрон навбатларни тақдим этиш қурилмаси мониторларида ҳавола этиб турилади.
Дарҳақиқат, коррупция жамият учун катта хавф, шунинг учун ҳам юртимизда бу иллатга қарши тизимли кураш олиб борилмоқда. Микрокредитбанк тизимида меҳнат қилаётган ҳар бир ходимга ҳам коррупциянинг оқибатлари ҳақида мунтазам тарғибот-тавшиқот ишлари ўтказилмоқда.

Акмал Хамидов,
«Микрокредитбанк» АТБ Бошқарув
раисининг биринчи ўринбосари в.б.