БМТ Россия Федерациясини КХДРга қарши санкцияларга риоя қилишга чақирди

БМТ Бош котиби Антониу Гутерришнинг айтишича, Россия БМТ Хавфсизлик кенгаши томонидан Шимолий Кореяга қарши жорий қилинган санкцияларга амал қилиши керак. Баёнот Москва ва Пхенян шу ҳафта ўзаро муносабатларни чуқурлаштириш бўйича келишув имзолагани ва ҳар икки томонга қуролли тажовуз содир бўлган тақдирда зудлик билан ҳарбий ёрдам кўрсатишга келишиб олганидан сўнг янгради.

Россия президенти Владимир Путин ва Шимолий Корея етакчиси Ким Чен Иннинг шартнома имзолаши АҚШнинг Пхенян Украинага қарши урушда фойдаланиш учун Москвага қурол-яроғ ўтказаётганликда айблаши фонида содир бўлди. Россия ва Шимолий Корея бу айбловларни рад этади.

Бирлашган Миллатлар Ташкилоти Хавфсизлик Кенгаши Пхенян томонидан кенгаш резолюцияларини бузган ҳолда эҳтимолий қурол етказиб бериш масаласини муҳокама қилмоқчи бўлган АҚШ, Франция, Буюк Британия, Жанубий Корея ва Япония илтимосига кўра, 28 июнь куни Шимолий Корея бўйича йиғилиш ўтказишни режалаштирмоқда. .

2006 йилдан буён Шимолий Корея ракета-ядро дастури туфайли БМТ санкциялари остида қолган ва бу санкциялар Россия кўмагида бир неча бор кучайтирилган.

«КХДРга қарши Хавфсизлик Кенгаши томонидан тасдиқланган санкциялар мавжуд. Ҳар қандай давлатнинг КХДР билан, жумладан, Россия Федерацияси билан сақлайдиган ҳар қандай муносабатлари ушбу санкцияларга тўлиқ мос келиши керак», — деди Гутерриш.

Россиянинг БМТдаги миссияси Гутерришнинг сўзларига изоҳ беришдан бош тортди.