Ramazon arafasida: oziq-ovqat narxlari 10 foizga oshdi
Ramazonga sanoqli kunlar qolganida Tojikiston bozorlarida oziq-ovqat mahsulotlarining narxi o‘rtacha 10 foizga ko‘tarilgani kuzatilmoqda.
Asia-Plus nashrining xabar berishicha, poytaxt Dushanbe bozorlarida bir kilo go‘shtning narxi 40 somonidan 45 somoniga ($4,2 dan $4,7 ga) chiqqan. Bir qop unning narxi esa 200 somoni ($21) bo‘lgan, vaholanki, bir necha kun avval 180 somoni ($19) edi.
Qishloq xo‘jaligi mahsulotlarining narxi ham oshgan. Masalan, 3 somonidan sotilayotgan bodring 4 somoniga chiqqan. Sotuvchilar buni ob-havoning noqulay kelishi bilan izohlamoqda. Shuningdek, karam, piyoz, sabzi va pomidorning narxi ham oshgan.
O‘tgan yili Tojikiston prezidenti Imomali Rahmon tadbirkorlarni Ramazonda narxlarni sun’iy ravishda oshirmaslikka chaqirgan edi.