Lufthansa Yaqin Sharqqa parvozlarni vaqtincha to‘xtatdi
Yaqin Sharqdagi vaziyat keskinlashgani sababli Germaniyaning Lufthansa aviakompaniyasi 14 aprel, yakshanba kuni Tel-Aviv, Iroqning Erbil va Iordaniya poytaxti Ammanga parvozlarini 16 aprel, seshanba kuniga qadar to‘xtatganini ma’lum qildi. Isroil, Iordaniya va Iroq ustidagi havo hududi ochiqligicha qolmoqda. Lufthansa kamida 18 aprelgacha Bayrut va Tehronga uchmaydi.
Germaniyaning flagman aviatashuvchisi, shuningdek, Shveysariya va Avstriya aviakompaniyalarini o‘z ichiga olgan guruh o‘z bayonotida Yaqin Sharqdagi xavfsizlik bilan bog‘liq vaziyatni doimiy ravishda baholayotganini va rasmiylar bilan yaqin aloqada ekanligini bildirdi.
Ikki kun oldin kompaniya Tehronga va undan 18 aprelgacha reyslarni to‘xtatib turishini va bu vaqt ichida Eron havo hududidan foydalanmasligini e’lon qilgan edi.
