Hindistonda koronavirusni aniqlashda yordam beruvchi maxsus ilovani ishlatish majburiy qilib qo‘yildi

Hindistonda davlat va xususiy sektorda ishlovchi barcha ishchilarning Bluetooth kuzatish dasturidan foydalanish va idoralarda ijtimoiy masofalanish majburiy etib belgilandi.

Juma kuni Bosh vazir Narendra Modi hukumati Hindistonda koronavirus tarqalishiga qarshi kurashish uchun karantin yana ikki haftaga uzaytirilganini e’lon qildi. Ammo, virus xavfi kam bo‘lgan hududlarda cheklovlar yumshatilishiga ruxsat berildi.

Hindiston o‘tgan oyda koronavirus bilan kurashish doirasida Aarogya Setu deb nomlangan Bluetooth va GPS orqali ishlaydigan tizimni ishga tushirdi. Bu mobil ilova Hindiston Milliy Informatika Markazi tomonidan ishlab chiqilgan. Ilova odamlarni o‘zlari uchrashgan insonda koronavirus aniqlangani haqida ogohlantiradi.

Hindiston texnologiya vazirligi rasmiylari 1,3 milliard odam yashaydigan mamlakatda mazkur ilovaning samara berishi uchun u kamida 200 million kishining telefonida bo‘lishi kerakligini aytdi.

Google Play Store ma’lumotlariga ko‘ra, ushbu ilova Android telefonlarida taxminan 50 million marta yuklab olingan.

Mazkur dastur hukumatga virusning avj olgan nuqtalarini aniqlashda yordam beradi va ilova haqidagi ma’lumotlar faqat tibbiy maqsadlar uchungina ishlatiladi.

Hindistonda hozirgacha 37000 dan ortiq kishiga koronavirus tashxisi qo‘yilgan va ularning 1218 nafari vafot etgan.