Bayden Netanyaxuni ishontirishga qiynalmoqda
![Bayden Netanyaxuni ishontirishga qiynalmoqda Bayden Netanyaxuni ishontirishga qiynalmoqda](/photos/news/VOYz3sdHYwTDtw0.jpeg)
AQSh prezidenti Jo Bayden Isroil Bosh vaziri Binyamin Netanyaxu bilan telefon orqali muloqot qilib, G‘azo sektorida Isroil va Falastinning HAMAS harakati o‘rtasida o‘t ochishni to‘xtatish kelishuvini muhokama qildi. Bu haqda Oq uy matbuot xizmati xabar berdi.
«Prezident Bayden Isroil Bosh vaziri Benyamin Netanyaxu bilan suhbatlashib, o‘t ochishni to‘xtatish va garovga olinganlarni ozod qilish, shuningdek, mintaqadagi keskinlikni yumshatish bo‘yicha diplomatik sa’y-harakatlarni muhokama qildi», — deyiladi xabarda.
Oq uy, shuningdek, vise-prezident Kamala Xarris muloqotga qo‘shilganini aytdi.
Vashingtondagi Reuters manbalariga ko‘ra, Bayden Netanyaxuni Filadelfiya koridorini nazorat qilish masalasida moslashuvchan bo‘lishga ko‘ndirishga uringan. Netanyaxu G‘azo va Misr chegarasida Isroil armiyasi mavjudligini talab qilsa da, Qo‘shma Shtatlar kelishuvning birinchi bosqichida kuchlarni sezilarli darajada «siyraklashtirishni», ikkinchisida esa belgilangan hududni butunlay tark etishni talab qilmoqda.
Benyamin Netanyaxuning idorasi uning Bayden bilan suhbati haqidagi xabarlarga izoh bermadi.