Гўдакка биринчи қўшимча овқат қандай тайёрланади?

Олти ойдан сўнг гўдакнинг энергия ва озуқа моддаларига бўлган эҳтиёжи она сути билан таъминланувчи моддалардан орта бошлайди. Натижада унга қўшимча овқат бериш зарурати туғилади.

Агар кичкинтойга бу ёшда она сутига қўшимча равишда бирор таом берилмаса ёки нотўғри тартибда берилса, унинг ривожланишига салбий таъсир этиши мумкин.

Қуйида бир ёшгача бўлган гўдакларга қўшимча таом тайёрлаш талаблари ва овқатлантириш гигиенасига оид муҳим маълумотлари билан танишасиз.

— Бир ёшгача бўлган фарзандингиз учун қўшимча егулик ҳозирлаётганда унинг қайнатилган ва буғда пиширилган бўлиши, тузсиз ва шакарсиз тайёрланиши, қирғичдан ўтказилиши (эзилиши), энг муҳими, янги маҳсулотлар танланишига алоҳида эътибор беринг.

Шунингдек:

болани овқатлантиришда унинг қўллари тозалиги;

таом пишириладиган қозон ва идиш товоқларнинг алоҳида бўлиши;

кичкинтой овқатланадиган ликопча алоҳида ювилиб, қуритилиши;

ювилган идишларнинг усти ёпиқ бўлишини назорат қилишингиз керак.

Қўшимча овқатни бошлашдан олдин педиатр билан маслаҳатлашинг. Мутахассис сизга уни нимадан бошлашингизни, қанча миқдорда ва гўдакка неча марта беришингизни аниқлаб беради.

Қўшимча озуқалар кунлик таомномага киритилган пайтда кўкрак сути асосий овқат бўлиб қолади. Боланинг тиши чиқаётган пайти, профилактик эмлашлар ўтказган кунлари, куннинг иссиқ пайтида бундай овқатларни гўдакка беришни бошлаш мақсадга мувофиқ эмас.

Қолаверса:

янги қўшимча овқат бериш оралиғи ўртача 10-12 кун бўлиши лозим;

ҳар доим таомлантириш чоғида унинг ҳароратига эътибор беринг;

гўдакка бериладиган егулик имкон борича бир марта истеъмол учун мўлжалланиши зарур;

бир кун аввал тайёрланган овқатни иситиб бериш мумкин эмас;

эрталаб бериладиган таом кечқурун пиширилмайди;

қўшимча таомни куннинг биринчи ярмида берган мақсадга мувофиқ.