“Чорвоқ” сув омборида навбатдаги фожиа: мутасадди ташкилотлар қаерга қараяпти?
![“Чорвоқ” сув омборида навбатдаги фожиа: мутасадди ташкилотлар қаерга қараяпти? “Чорвоқ” сув омборида навбатдаги фожиа: мутасадди ташкилотлар қаерга қараяпти?](/photos/news/sqAyW3Z0NY5h5Nb.jpeg)
Тошкент вилояти, Бўстонлиқ туманида 20 июль куни соат 14:30ларда “Чорвоқ” сув омборининг “Бурчмулло” сув ҳавзасида аянчли воқеа содир бўлди.
Тошкент вилояти ФВБ навбатчиларидан олинган хабарга кўра, 2005 йилда туғилган Қодиров Фозилжон Имом ўғли скутер ҳайдаётган вақтида вақтида бошқарувни эплай олмай, қаршисидаги катамаранга урилган. Натижада катамаранда бўлган 2 нафар фуқаро — 1998 йилда туғилган Жўрабоев Абдуҳаким Муҳаммаджон ўғли (Фарғона вилояти, Тошлоқ туманида яшаган) ва 1996 йилда туғилган Содиқов Акмалжон Азимжон ўғли (Фарғона вилояти, Ёзёвон туманида яшаган) тан жароҳати олиши натижасида воқеа жойида вафот этган.
Бош прокуратура матбуот котибининг ёзишича, ҳолат юзасидан Жиноят кодексининг 260-моддаси (Темир йўл, денгиз, дарё ёки ҳаво транспортининг ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган. Тергов ҳаракатлари олиб борилмоқда.
Шу ўринда ҳақли савол туғилади: "Чорвоқ” ТРЗ дирекцияси раҳбарияти ҳудуддаги барча воқеаларга жавобгар ҳисобланади. Хўш, дирекция раҳбарияти қаерга қараяпти? Бундан ташқари, Фавқулодда вазиятлар вазирлиги, Экология ва Сув хўжалиги вазирликлари, Тошкент вилояти ҳокимлиги ва бошқа мутасаддиларчи? Наҳотки ушбу ҳудудда скутерларни тартибга солиш, умуман, хавфсизлик чораларини таъминлаш борасида қатъий чоралар кўриш қийин бўлса? Умид қиламизки, мутасадди ташкилотлар бу борада керакли чораларни кўришади ва юқоридаги каби фожиаларнинг олди олинади.