Кекса фаластинлик Исроил қамоқхонасида маъмурий ҳибсга олинган ҳолда вафот этди
![Кекса фаластинлик Исроил қамоқхонасида маъмурий ҳибсга олинган ҳолда вафот этди Кекса фаластинлик Исроил қамоқхонасида маъмурий ҳибсга олинган ҳолда вафот этди](/photos/news/exWgBLKejL3u0RU.jpeg)
Маъмурий ҳибсга олинган 63 ёшли фаластинлик Мустафо Муҳаммад Абу Арра Исроил қамоқхонасида вафот этди.
Бу ҳақда Фаластин асирлари жамияти ҳамда Фаластин озодлик ташкилоти асирлар ва озодлик қўмитасининг қўшма ҳисоботида айтилади.
Хабарда келтирилишича, босиб олинган Ғарбий Соҳилдаги Тубас чеккасидаги Ақаба қишлоғида яшовчи фуқаро соғлиғи ёмонлашгани учун Сорока ҳарбий госпиталига ётқизилган, бироқ шифокорлар унинг ҳаётини сақлаб қола олмаган.
Абу Арра етти фарзанднинг отаси эди ва 1990 йилдан бери бир неча бор Исроил қамоқхонасида ҳибсда сақланган. Умуман олганда, кекса фаластинлик Исроил қамоқхоналарида 12 йил ўтказди. 2023 йил 30 октябрда у яна маъмурий қамоққа олинган.
«Абу Арра ҳибсга олинишидан олдин соғлиғида жиддий муаммоларга дуч келган. У дори-дармонлардан маҳрум бўлиб, ўлимга қолдирилди. Бу Фаластин халқига қарши давом этаётган геноцид жиноятларининг бир қисми сифатида амалга оширилди», — дейилади баёнотда.
Фаластинлик маҳбуслар жамияти ва Фаластинлик асирлар ва озодлик ташкилотининг маҳбуслар ва озодлик қўмитаси Исроил қамоқхонаси раҳбариятини фаластинликнинг ўлими, шунингдек, Исроил қамоқхоналарида жазо ўтаётган 9,7 минг бошқа фаластинликларнинг тақдири учун жавобгар деб топди.
2023 йил 7-октабрдан бери Исроил қамоқхоналарида ҳалок бўлган фаластинликлар сони 19 нафарга етди.