Олимпиада очилиши куни Францияда поездлар ҳаракати тўхтаб қолди
![Олимпиада очилиши куни Францияда поездлар ҳаракати тўхтаб қолди Олимпиада очилиши куни Францияда поездлар ҳаракати тўхтаб қолди](/photos/news/XQTmtX63S2tJmX8.jpeg)
2024 йилги ёзги Олимпиада ўйинларининг очилиш маросимига бир неча соат қолганда Франция пойтахти темир йўл транспортида катта узилиш юз берди.
Бу ҳақда Франциядаги йўловчи темир йўл транспортининг асосий оператори SNCF (Société nationale des chemins de fer français) Франция темир йўллари миллий компанияси хабар берди.
Компаниянинг Х саҳифасидаги хабарга кўра, «ҳужумчиларнинг ҳаракатлари» Атлантика океани қирғоқлари, шимол ва шарқдаги тезюрар йўналишларга таъсир кўрсатди.
SNCF таъкидлашича, қўшни Бельгияга ва Ла-Манш бўйлаб Лондонга кетаётган поездлар ҳаракатида узилишлар бўлган.
Тезюрар поездлар тармоғини бузишга қаратилган йирик ҳужумдан сўнг кўплаб поездлар йўналиши ўзгартирилди ёки бекор қилинди, дейилади хабарда.
«Биз барча йўловчиларимиздан саёҳатларини кечиктириш ва станцияга бормасликларини сўраймиз», деди SNCF ва яқин орада фуқароларга мавжуд вазият ҳақида хабар беришини қўшимча қилди.
Кейинроқ SNCF яна бир баёнот чиқариб, поездлар ҳаракатининг бузилишига олиб келган ҳужумлар ва ҳаракатларни «ўт қўйиш» деб атади. Операторнинг хабар беришича, темир йўл транспортидаги узилиш 800 минг йўловчига таъсир кўрсатди.
Франция транспорт вазири Патрис Вергрие матбуот анжуманида барча мавжуд далиллар ўт қўйиш версиясини тасдиқлаётганини айтди. «Кўпчиликнинг саёҳатига халақит берадиган бу жиноий ҳаракатларни кескин қоралайман», — деб ёзди вазир ижтимоий тармоқда.
Франция Бош вазири Габриел Аттал Хда «SNCF объектларида режалаштирилган ва мувофиқлаштирилган саботаж ҳаракатлари амалга оширилган» деб ёзган. «Бизнинг разведка хизматларимиз ва ҳуқуқ-тартибот идораларимиз ушбу жиноий ҳаракатлар учун айбдорларни топиш ва жазолаш учун сафарбар этилган», - дея қўшимча қилди у.