Трамп Зеленскийга Россия "Наполеон ва Гитлерни мағлуб этганини" айтди
![Трамп Зеленскийга Россия "Наполеон ва Гитлерни мағлуб этганини" айтди Трамп Зеленскийга Россия "Наполеон ва Гитлерни мағлуб этганини" айтди](/photos/news/0apoJiN1cjZHZeH.jpeg)
Республикачилар партиясидан АҚШ президентлигига номзод Дональд Трамп Украина президенти Владимир Зеленский билан телефон суҳбати тафсилотларини ошкор қилди. Жаноб Трамп унга Россия билан ҳарбий можарога барҳам бериш зарурлиги ҳақида гапирди.
"Президент Зеленский менга қўнғироқ қилди. Ва биз яхши суҳбатлашдик. Мен бу урушни тугатишимиз кераклигини айтдим. Қаршингизда уруш машинаси ... Улар Гитлерни мағлуб этишди. Улар Наполеонни мағлуб этишди", — деди АҚШнинг собиқ президенти Fox News телеканалига берган интервьюсида.
Унинг фикрича, Американинг амалдаги президенти Жо Байден можарога йўл қўймаслиги керак эди. "Бунинг содир бўлиш эҳтимоли нолга тенг эди ва менинг тўрт йил давомида бу содир бўлмади" - дея қўшимча қилди Дональд Трамп.
Зеленский ва Трамп ўртасидаги суҳбат 19 июль куни бўлиб ўтган. Бу уларнинг Дональд Трамп 2021 йилда лавозимини тарк этганидан кейин биринчи суҳбати эди. Украина раҳбарининг айтишича, улар шахсий учрашувда “айнан қандай қадамлар тинчлик адолатли ва чинакам мустаҳкам бўлиши мумкинлигини” муҳокама қилишга келишиб олган.
АҚШда президентлик сайловлари 5 ноябрь куни бўлиб ўтади. Дональд Трамп Украинадаги можарога 24 соат ичида барҳам бериши мумкинлигини бир неча бор айтган.