Turkiya Iroqdan qo‘shinlar olib chiqilishi haqidagi mish-mishlarni rad etdi
![Turkiya Iroqdan qo‘shinlar olib chiqilishi haqidagi mish-mishlarni rad etdi Turkiya Iroqdan qo‘shinlar olib chiqilishi haqidagi mish-mishlarni rad etdi](/photos/news/VY1t2F3t1VhS1H0.jpeg)
Turkiya prezidenti huzuridagi dezinformasiyaga qarshi kurash markazi Iroq bilan imzolangan kelishuv turk harbiy kuchlarini Iroq hududidan olib chiqib ketishni nazarda tutayotgani haqidagi ma’lumotni rad etdi. Bayonotda ta’kidlanishicha, harbiy muvofiqlashtirish va terrorizmga qarshi kurash masalalariga bag‘ishlangan hujjatda bunday band yo‘q.
Kelishuvga ko‘ra Turkiya va Iroq Bag‘dod va Bashiqada xavfsizlik va qo‘shma mashg‘ulotlarni muvofiqlashtirish uchun mushtarak markazlar tashkil etadi. Bu markazlarning faoliyati terrorchilik tashkilotlari tomonidan kelayotgan tahdidlarni bartaraf etish, mintaqada xavfsizlik va barqarorlikni ta’minlashga qaratilgan bo‘ladi.
Bayonotda Turkiyaning ham mamlakat ichkarisida va xorijda terrorizmga qarshi qat’iyatli kurash olib borayotgani ta’kidlandi. Turkiya prezidenti huzuridagi dezinformasiyaga qarshi kurash markazi fuqarolarni norasmiy manbalardan olingan tasdiqlanmagan ma’lumotlarga ishonmaslikka chaqirdi.