Hindistonlik shifokor “Anamed”da ish boshladi

 

Namangan shahridagi “ANAMED” diagnostika markazi rahbari N.Abdullaxonov xususiy tibbiyot muassasalari orasida Farg‘ona vodiysida birinchilardan bo‘lib bu borada amaliy qadam tashladi. U o‘zining diagnostika va davolash markaziga hindistonlik shifokor, doktor Paramjit Singxni shartnoma asosida ishga taklif qilib, endokrinologiya va kardiologiya kasalliklari bo‘yicha Hindistonga shifo izlab borish maqsadida yurgan yurtdoshlarimizning uzog‘ini yaqin, mushkulini oson qilishdek ezgu maqsadini ro‘yobga chiqardi. 

 

Biz hindistonlik shifokor Paramjit Singxni suhbatga tortdik: 

 

 

– Men 2012 yilda birinchi marta Toshkentga konferensiya ishtirokchisi va sayyoh sifatida kelgan edim. Ayni shu mening hayotimda katta burilishlar yasagan sayohat bo‘ldi. Chunki, menda o‘sha sayohat natijasida Toshkentda o‘qish istagi paydo bo‘ldi va uch yil Toshkent tibbiyot akademiyasida tahsil oldim. Keyin Hindistonga qaytib, xususiy klinika ochdim. Biroq, negadir meni O‘zbekiston o‘ziga tortaverdi. 2015 yilda yana O‘zbekistonga kelib Samarqanddagi klinikalardan birida ishlab yurganimda “ANAMED” diagnostika markazi rahbari bilan tanishib qoldik va bu mening bugun shu markazda ish boshlashimga turtki bo‘ldi. 

 

 

– Men tibbiyot yo‘nalishidagi bakalavr diplomini Rossiyaning Sankt-Peterburg tibbiyot institutida olganman. Keyinchalik o‘z yurtimda kardiologiya mutaxassisligi bo‘yicha Panjob universitetida magistraturani tamomladim. Daniya, Shvesiya, Singapurda o‘qidim. Xullas, 2003 yildan buyon o‘qish va ishni barobar olib boraman. Tibbiyot sohasida o‘qish va izlanishni aslo to‘xtatib bo‘lmaydi. Toshkentda o‘qishimga sabab esa, O‘zbekiston tibbiyot sohasida yangi izlanishlar imkoniyatiga ega, o‘z ustingda ishlashga rag‘bat uyg‘otadigan mamlakat, deb bilganimdir. Bugun O‘zbekiston tibbiyoti ham moddiy-texnik ta’minot, ham ijtimoiy siyosat va ham malakali mutaxassislar ko‘payib borayotgani jihatidan astoydil ishlaydigan sohadir. Bu yerda o‘zbek hamkasblarimizdan o‘rganadigan jihatlar ham ko‘p. Men ular safida o‘zgacha bir ishtiyoq bilan ishlayapman. 

 

 

– An’anaviy usullardan farqli ravishda kasallikning o‘zini emas, balki uning ildizi va asoratlarini ham davolashga alohida e’tibor qarataman. Yana davolashda ukol, osma ukol kabi in’ektiv igna sanchish usullaridan foydalanmayman, faqat shifobaxsh giyohlardan tayyorlangan tabletkalar bilan davolayman. 

 

 

– Endokrinologiya va kardiologiyani rivojlantirish, bu sohalarda aholiga jahon andozalari darajasida diagnostika va davolash xizmati ko‘rsatilishiga hissa qo‘shish. O‘zbek va hind xalqlarining madaniy aloqalari ildizi ko‘p asrlarga borib taqaladi. Mamlakatingizda amalga oshirilayotgan islohotlar tufayli boshqa sohalardagi hamkorlikda ham keng imkoniyatlar ochilmoqda. Men bu tibbiyot markaziga bir yillik shartnoma asosida ishga kelgan edim. Nazarimda umrbod qoladiganga o‘xshayman. Ha, Hindistonda o‘zimning xususiy tibbiyot markazim bo‘lishiga qaramay, O‘zbekiston meni ohangraboday o‘ziga tortaveradi. 

 

Tadbirkor N.Abdullaxonov Namangan shahri markazida ochgan mazkur muassasa ish boshlaganiga ikki yil bo‘ldi. Ikki yil davom etgan bunyodkorlik ishlari natijasida zamonaviy shaharsozlik talablariga javob beradigan to‘rt qavatli muhtasham bino qad rostladi. Unda jahonning eng ilg‘or klinikalari andozalari asosida sharoit va imkoniyatlar yaratilgan. Masalan, eshiklari ham bino ichiga va ham hovliga ochiladigan lift shoshilinch keltirilgan bemorlarni gavjum foyedan yurmay mashinadan to‘g‘ri liftga olib kirish imkonini beradi. 

 

Neyrojarrohlik, nevrologiya, kardiologiya, urologiyaga ixtisoslashgan ushbu markaz eng ilg‘or diagnostika uskunalari va boshqa tibbiy asboblar bilan jihozlangan. Jumladan, oxirgi avlod UTT apparati tashxis aniqligi va funksional imkoniyatlari nuqtai nazaridan mamlakatimizda qo‘llanilayotgan sanoqli uskunalardan biri. Shuningdek, markazning laboratoriya, nevropatologiya, radiologiya, endokrinologiya bo‘limlarida ham General Yelektrik, Siemens kabi mashhur kompaniyalarda ishlab chiqarilgan tibbiyot texnikalari vositasida yuqori malakali tibbiy xizmat ko‘rsatilmoqda. Ko‘chma rentgen, neyrojarrohlik stoli, anesteziologiya uskunasi, mikroiqlim hosil qilish, yoritish, sun’iy nafas oldirish va boshqa ko‘plab yo‘nalishlar bo‘yicha eng zamonaviy qurilmalar bilan jihozlangan ikkita jarrohlik blokida jahon andozalari darajasida jarrohlik amaliyotini o‘tkazish mumkin. Jonlantirish xonalari avtonom kommunikasiya tizimi bilan ta’minlangan, bu xonalarda muayyan bemorga qulay va zarur iqlim sharoiti hosil qilib beriladi. 

 

Bundan tashqari, joriy yilda shifo maskaniga “Siemens Acison SC 2000” rusumli kardioUZI, Buyuk Britaniyaning “BTL” kompaniyasida ishlab chiqarilgan fizioterapiya muolajasi uskunalari jamlanmasi keltirib o‘rnatildi. Hozirda 52 o‘rinli stasionar davolash bo‘limida pardozlash ishlari yakuniga yetish arafasida. 

 

Albatta, muassasada zamonaviy uskunalar bilan ishlay oladigan malakali kadrlar jamoasini shakllantirishga ham alohida e’tibor qaratilmoqda. Bu borada ilmiy-amaliy hamkorlik bo‘yicha Qozon shahrining mintaqalararo klinik diagnostika markazi bilan memorandum imzolangan. O‘tgan davr mobaynida bir guruh shifokorlar u yerda 160 soatlik kurslarda malaka oshirib qaytdi va o‘zlashtirgan bilim-mahoratini hozir amaliyotga tatbiq etish barobarida hamkasblariga ham o‘rgatmoqda. 

 

Bu yerda 25 kishi doimiy ish bilan ta’minlangan. Stasionar va fizioterapiya bo‘limlari ishga tushirilishi bilan yana 30 dan ziyod yangi ish o‘rni yaratiladi. Markaz o‘z faoliyatini boshlagandan buyon o‘tgan qisqa vaqt mobaynida 2 mingdan ziyod bemorga yuqori sifatli tibbiy xizmat ko‘rsatdi. 

Manba: uza.uz