"Barsa"ning faol starti, bahsli vaziyatlar va el-klasiko uchun tug‘ilgan Jud Bellingem

Ispaniya La Ligasi 32-turida "Real" o‘z maydonida "Barselona"na qabul qilib, navbatdagi kambekni amalga oshirdi.

"Real Madrid" va "Barselona" o‘rtasidagi o‘yin avvaliga Ispaniya chempionatining ushbu mavsumidagi intriga uchun so‘nggi imkoniyat deb qaraldi. To‘g‘ri, kataloniyaliklarga faqat g‘alaba qozonish kerak edi. Shunga qaramay, Xavi hujumkorroq bo‘lgan Pedrini emas, balki yarim himoyada Kristensen bilan biroz tartibliroq tarkibni tanladi. "Real" esa aksincha ancha dadil ko‘rindi. Himoya chizig‘i (Kamavinga, Ryudiger, Tchuameni, Vaskes) yarim himoyachilar bilan to‘ldirildi. Ko‘rinib turibdiki, shuning uchun ham joriy mavsumni yarmini zaxira o‘rindig‘ida boshlagan Modrich uchun bu o‘yinda maydon markazida joy bor edi.

Uchrashuv mehmonlarning tezkor goli bilan boshlandi. Rafinya burchakdan jamoadoshiga aniq to‘p oshirdi va Kristensen boshi bilan gol urdi. Bu yerda xato kimda ekanligini aniqlash qiyin: to‘pga chiqishda Luninning xatosimi yoki Kroosning passivligi. Balkim Kristenning mahoratidir.

Umuman olganda, "Barsa" raqib jarima maydonchasiga kirib kelganida "qirollik klubi" futbolchilari yengil "mondaraj"ni his qilib turishdi. Himoyachilarning miyasi soniyalarga o‘chib qolayotganga o‘xshardi. Umuman olganda, bu hozirgi "Real Madrid"ning yagona zaif nuqtasidir. Ayniqsa, La Liga joriy mavsumidagi yagona mag‘lubiyatni hisobga olsak "Atletiko" hamshaharlagia uchta bosh bilan goli urib ketgandi.

Biroq, "Real Madrid" gol urish uchun raqibidan yaxshiroq bo‘lishi shart emas. Lukas Vaskes kecha o‘zining eng yaxshi o‘yinlaridan birini o‘tkazdi. U raqib jarima maydonchasi ichida avvaliga Kanseluni, keyin esa Kubarsini ortda qoldirdi. Boshqa yugurishning hojati yo‘q edi, chunki kataloniyaliklarning 17 yoshli himoyachisi unga qo‘pollik ishlatgandi. Hakam penalti belgiladi. To‘p yoniga yaqinlashgan Vinisius xotirjamlik bilan uni golga aylantirdi - 1:1. Kataloniyaliklarning muammolari shu bilan tugamadi. Tanaffus oldidan jamoa yetakchilaridan biri Frenki De Yong jarohat oldi. Ha, yana.

Ikkinchi bo‘limda "Barselona" ko‘plab o‘zgarishlarni amalga oshirdi. Qaysidir pallada almashtirishlar bo‘yicha hisob 4:0 bo‘ldi. “Barsa” safida Feliks va Torres maydonga tushdi, shuningdek, keyinchalik maydonga tushgan Fermin ham gol urdi. Ushbu golda mehmonlardan biri ofsaydda qolgandek tuyuldi, ammo takroriy lavha gol to‘g‘ri hisoblanganini ko‘rsatdi. “Barselona” yana oldinga chiqib oldi.

Biroq bu safar "Real" birinchi bo‘limdagidan ham tezroq javob qaytardi. Oradan to‘rt daqiqa o‘tib Vinisiusning uzatmasini Lukas Vaskes darvozaga joylab qo‘ydi. Mezbonlar shu qadar tezkor kombinasiyaga ega bo‘lishdiki, raqiblarning hech biri hatto to‘p uchun kurashishga ham ulgurmadi.

Agar o‘yin oxirida g‘alabaga kim yaqin edi deb so‘rasangiz, bu "Real". Bir vaziyatda Vinisius birga-bir vaziyatdan foydalana olmadi. "Barsa" posboni jamoasini muqarrar goldan qutqardi. Ammo Bellingem o‘z imkoniyatini qo‘ldan boy bermadi. 90+1-daqiqada u yana "qirollik klubi"ga g‘alaba keltiruvchi golni kiritdi. Qolaversa, golli uzatmani asosiy tarkibda kamdan-kam o‘ynaydigan Vaskes amalga oshirdi. Birinchi davradagi klasikoda ham Jud qo‘shib berilgan daqiqalarda g‘alaba golini urib ketgandi. Odam o‘ylanib qoladi, Jud el-klasiko uchun tug‘ilganmi o‘zi?

O‘yin 30-daqiqasida bahsli vaziyat yuzaga keldi. Burchak zarbasidan so‘ng Yamal to‘pni darvozaga burib yubordi. Lunin birinchi urinishda to‘pni qaytara egallay olmadi, keyin esa ushlab oldi. "Barsa" futbolchilari darvozabon to‘pni darvoza ichidan qaytarganini aytib hakamga yuzlandi. VAR bilan uzoq maslahatlashgan bosh hakam gol yo‘q deb topdi. Ammo shunisi aniq ediki taqdim etilgan takroriy lavhalarning birortasi to‘p aniq chiziqni kesib o‘tganini ko‘rsatib bera olmadi.

Shunchaki, La Liga kabi katta millionlab kuzatuvchilariga ega chempionat golni aniqlash tizimidan voz kechgani bugun ularning zarariga ishladi. Liga prezidenti Tebas bu tizim uchun yiliga 3 million sarflashni xohlamagan ekan. Ana endi millionlab tanqidlar u tomon otiladi.