BAA 13 ta davlat fuqarolariga viza berishni to‘xtatdi

Birlashgan Arab Amirliklari (BAA) 13 davlat fuqarolariga viza berishni to‘xtatdi. Viza taqiqiga uchraganlarning aksari musulmon mamlakatlardir.

Ma’lum bo‘lishicha, BAAda 18 noyabrda kuchga kirgan yo‘riqnomaga binoan bu davlatlarning fuqarolariga ishlash va sayohat qilish uchun viza berilmaydi. Taqiq Eron, Suriya, Somali, Afg‘oniston, Liviya, Yaman, Jazoir, Keniya, Iroq, Livan, Pokiston, Turkiya va Tunis fuqarolariga nisbatan joriy etildi. 

“Reyter” agentligiga intervyu bergan BAAlik mutasaddilardan biri afg‘onistonliklar, pokistonliklar va boshqa ayrim davlatlarning fuqarolariga viza berishning to‘xtatilishi xavfsizlik choralari bilan bog‘liqligini va taqiq uzoq davom etmasligini aytgan. Biroq u xavfsizlik bilan bog‘liq xavotirlar aynan nimalar ekanligini ma’lum qilmagan. 

O‘tgan haftada Pokiston ham BAA fuqarolariga viza berishni to‘xtatgan edi.