Португалиялик футбол агенти Роналдунинг асосий таркибда майдонга тушишини хато деб ҳисобламоқда
Футбол агенти Паулу Барбоза Криштиану Роналду Португалия терма жамоаси сафида асосий таркибда майдонга тушиши керак эмас деб ҳисоблайди.
Агент Португалиянинг Евро—2024 гуруҳ босқичида Грузияга 0:2 ҳисобида мағлуб бўлганидан сўнг ўз фикрларини билдириб ўтди.
“Ўйин натижаси Мартинес жамоаси учун огоҳлантириш қўнғироғи бўлди, деб ўйлайман. Ҳар доим ўз даражангизни сақлашингиз керак. Таркибга ҳозирги кунда энг кучлиларни қўйиш лозим.
Нега Грузияга қарши ўйинда Роналду асосий таркибда майдонга тушди? Тўғрисини айтсам, жавобим ҳам бор. У қанақадир навбатдаги рекордини қайд этиши керак. Натижада эса бадалини биз тўладик.
Криштианунинг ўрнига Гонсалу Рамуш тушиши керак эди. Кўпчилик Роналдунинг Туркияга қарши ўйиндаги ҳаракатларига алданиб қолди.
Нега у голли узатмани амалга оширди? Ҳаммаси оддий, у шунчаки Европа Чемпионатларида ассистлар бўйича рекордни ҳам ўрнатмоқчи эди. Сабаб шу. Роналду ўз мақсадига эришди.
Мартинес — вазият қурбони. У Роналду билан низога боришни хоҳламайди. Шунинг учун мураббий ҳаммага Криш майдонда бўлишини уқтирмоқда. Менимча, бу хато! Бу жуда ҳам ёмон”, — дейди Барбоза.
