АҚШда Демократлар партиясидан бўлган Конгресс вакили Жо Байдендан истеъфога чиқишни талаб қилди
АҚШда Демократлар партияси вакили, Конгресс депутати Ллойд Доггет амалдаги президент Жо Байдендан истеъфога чиқишни талаб қилди. Бу ҳақда CNN нашри хабар берди.
Ллойд Доггет ўз баёнотини 2 июль куни Техас штатидан туриб эълон қилган. Чунки вакилнинг ўзи Техас штатидан Конгрессга тайинланган. Унинг президентга йўллаган нотаси кескин муҳокамаларни келтириб чиқарган. Доггет ўз баёнотида Конгресс аъзоларининг кўпчилиги президент истеъфоси ҳақида умумий фикрда эканини ошкор қилган.
“Мен бир пайтлар Линдон Жонсон вакиллик қилган Конгресс округининг эътиборли вакилиман. Айтишим мумкинки, турли қийин вазиятлар сабаб Жонсон вазифасидан кетиш ҳақида оғриқли хулосага келган эди. Байден ҳам шундай қилиши керак”, — деган Ллойд Доггет.
Доггетнинг баёноти ўтган ҳафта Байденнинг собиқ президент Дональд Трампга қарши самарасиз дебатлари ортидан партия хавотирларини бостиришга уринаётган президент ва унинг жамоаси атрофидаги босимни кучайтиради. Оқибатда президент партиясининг ўзида бўлиниш юзага келиши мумкин.
Сешанба куни Иллинойс штатининг Демократлар партиясидан тайинланган вакили Майк Куигли ҳам президентлик учун Байденни номзодини қайта кўриб чиқишни талаб қилган. Партия ичида бу лавозимга яхшироқ номзодлар борлиги айтилган.
“Менимча, унинг тўрт йиллик президентлиги энг зўр раҳбарлик даврларидан бири бўлди. Лекин у ўзига нисбатан виждонли бўлиши керак. Байден курсида энди ўтиролмайди”, — деган Куигли CNN нашрига берган интервьюсида.
Олдинроқ АҚШнинг CBS News нашри АҚШ аҳолиси ўртасида президент Байденнинг янги муддатга номзодини қўйишига нисбатан муносабатини ўрганиш учун сўровнома ўтказган эди. Унда қатнашганларнинг 70 фоиздан ортиғи Байденни янги муддатга сайланиш учун ақлий ва когнитив жиҳатдан муносиб эмас деб топган.
