O‘zbekiston Xotin-qizlar qo‘mitasi «jinoyatga moyilligi bor ayol» degan tushunchani yuridik jihatdan izohladi
O‘zbekistonda yuridik jihatdan «jinoyatga moyilligi bor ayol» degan tushuncha yo‘q. Bu haqda O‘zbekiston Xotin-qizlar qo‘mitasi bo‘lim boshlig‘i Shavkat Kazakboyev jurnalistlar bilan bo‘lib o‘tgan ochiq muloqotda ma’lum qildi, deya xabar bermoqda «Daryo» muxbiri Musulmonbek Ibrohimov.
Uning tushuntirishicha, qonunchilikda huquqbuzarlikka moyilligi borlar ikkiga — jinoiy va ma’muriy toifaga bo‘linadi.
Birinchi toifaga jazoni ijro etish muassalaridan qaytganlar, ichkilikka ruju qo‘yganlar, ruhiy kasallar, fohisha va fohishaxona saqlagan xotin-qizlar kiradi.
Ikkinchi toifaga esa farzand tarbiyasiga salbiy ta’sir ko‘rsatuvchi ayollar mansub.
Shavkat Kazakboyev, O‘zbekiston Xotin-qizlar qo‘mitasi bo‘lim boshlig‘i
2019 yil avgustida Toshkentda xotin-qizlarning 23 ta toifa bo‘yicha kartotekalari shakllantirilishi haqida xabarlar tarqalgan edi — ro‘yxatda, jumladan, uzoq vaqt chet elda bo‘lgan ayollar, ishsiz va vaqtinchalik propiskali xotin-qizlar kabi toifalar ham bor edi.