Toshkentning ayrim hududlarida gaz ta’minoti vaqtincha to‘xtatiladi

Ta’mirlash ishlari tufayli Sergeli tumanining ayrim hududlariga 24 iyun kuni soat 10:00 dan 17:00 gacha tabiiy gaz yetkazib berish vaqtincha to‘xtatiladi. Bu haqda “Hududgaz Poytaxt”ga tayanib Daryo nashri xabar berdi. Aholi iste’molchilari soni:

• “No‘g‘ayqo‘rg‘on” MFY Mohidil, Mohichehra, Gulzor va Erkinlik ko‘chalaridagi 426 ta yerli xonadon;
• “Qubaytepa” MFY Parizod va Qubaytepa ko‘chalaridagi 392 ta yerli xonadon;
• “So‘g‘diyona” MFY So‘g‘diyona-2 ko‘chasidagi 110 ta yerli xonadon.

Ulgurji iste’molchilar soni — 14 ta.

Ta’mirlash ishlari tugatilgandan so‘ng, tabiiy gaz ta’minoti qayta tiklanadi. Yuzaga kelayotgan noqulayliklar uchun gaz ta’minoti filiali iste’molchilardan uzr so‘raydi.

Eslatib o‘tamiz, 11 iyun kuni Yunusobod, Mirobod va Olmazor tumanlarining qator hududlariga tabiiy gaz yetkazib berish vaqtincha to‘xtatilgan edi. 10 iyun kuni ham Toshkentda qator hududlarda elektr va gaz ta’minoti vaqtincha to‘xtatilgan edi.