Mishel Barnye — Fransiyaning yangi bosh vaziri
Fransiya prezidenti Emmanuel Makron Mishel Barnyeni mamlakat bosh vaziri etib tayinladi, deb xabar bermoqda Le Monde.
73 yoshli Barnye zamonaviy Fransiya tarixidagi eng keksa bosh vazir hisoblanadi. Ilgari u Fransiya TIV rahbari (2004−2005) hamda bozor va xizmatlar bo‘yicha yevrokomissar lavozimlarida ishlagan.
Makron Barnyega «mamlakatga xizmat qiladigan birdamlik hukumatini» tuzishni topshirdi, deya ma’lum qildi prezident administrasiyasi.
Barnye hukumat rahbari sifatida 2024 yilning yanvarida bu lavozimga tayinlangan va Fransiya tarixidagi eng yosh bosh vazirga aylangan 35 yoshli Gabriel Attal o‘rnini egalladi.
Fransiya 7 iyuldagi navbatdan tashqari parlament saylovlaridan so‘ng deyarli ikki oy davomida doimiy hukumatsiz qoldi. Ularda birinchi o‘rinni «Yangi xalq fronti» so‘l partiyalar koalisiyasi egalladi, u Milliy majlisda 577 o‘rindan 82 o‘rinni egallagan. Ikkinchi o‘rinni Makronning «Birgalikda» markazchilar koalisiyasi band etgan. Marin Le Pen boshchiligidagi «Milliy birlashuv» boshchiligidagi o‘ta o‘ng partiyalar koalisiyasi 143 o‘rinni egallagan.
Hukmron partiyaning mag‘lubiyati fonida Attal iste’foga chiqdi, ammo siyosiy noaniqlik tufayli o‘z vazifasini bajarishda davom etdi. «Yangi xalq fronti» Makronga iqtisodchi va Parij moliya boshqarmasi rahbari Lyusi Kastet nomzodini taklif qildi, ammo prezident uni tayinlashni rad etdi.
Makron ma’muriyati bayonotida aytilishicha, Barnye «misli ko‘rilmagan maslahatlashuvlar davridan so‘ng» tayinlangan va prezident «bosh vazir va bo‘lajak hukumat maksimal darajada barqaror bo‘lish shartlariga javob berishi va maksimal darajada keng birlashish imkoniyatiga ega bo‘lishini» ta’minlagan.
Le Monde nashrining ta’kidlashicha, Barnye «eng nozik vazifani» hal qilishi kerak — o‘ta qutblangan parlamentda qonunchilikni muvofiqlashtirish. Yangi hukumat 1 oktyabrga qadar 2025 yil byudjeti to‘g‘risidagi qonun loyihasini taqdim etishi lozim.
