EI rasmiylari AQSh bilan munosabatlardagi vaziyatni yumshatishga harakat qilmoqda

Evropa Ittifoqi yetakchilari AQSh bilan munosabatlarning yomonlashuvida "vaziyatni yumshatish"ga harakat qilmoqda. Shu maqsadda Savdo va iqtisodiy xavfsizlik bo‘yicha Yevropa komissari Marosh Shefchovichning Vashingtonga navbatdagi tashrifi tashkil etildi. Bu haqda TASS yozmoqda.

Evropaning Politico nashrining xabar berishicha, tashrifda Yevrokomissiya raisi Ursula fon der Lyayen kabineti rahbari Byorn Zaybert ham ishtirok etadi. Safar Bryussel AQSh prezidenti Donald Trampning po‘lat va alyuminiyga import bojlarini joriy etishiga javob choralarini keyinga surgani bilan sodir bo‘ldi. Nashr hisob-kitoblariga ko‘ra, bu “Evropa Ittifoqining AQSh bilan savdo munosabatlarida kuchayib borayotgan keskinlikni yumshatishga qaratilgan navbatdagi urinishi” bo‘ladi.

"Biz zararli tariflarni joriy qilmaslik va dunyodagi eng kuchli bo‘lib qolayotgan Yevropa Ittifoqi va AQSh o‘rtasidagi savdo-iqtisodiy munosabatlarni yo‘q qilish o‘rniga, mustahkamlash uchun har ikki tomonning barcha sa’y-harakatlarini amalga oshirishimiz kerak", dedi YEKning savdo vakili Olof Gill.

Gazetaning eslatishicha, Yevropa Ittifoqi avvalroq AQShdan 21,5 milliard yevrolik importga javob bojlari joriy etish masalasini ko‘rib chiqqan, biroq YEI bu choralarni qabul qilishni aprel oyi boshiga ko‘chirishga qaror qilgan.

Politico nashriga ko‘ra, bunday harakat Bryusselga Vashington bilan muzokaralar olib borish uchun vaqt beradi. Yevropa Ittifoqi rasmiylari, shuningdek, javob choralariga shubha bilan qaraydigan ayrim davlatlarni, jumladan, Fransiya va Italiyani ham yagona pozisiyani egallashga ko‘ndirmoqchi.