Япониянинг йирик корпорацияси қурилиш соҳасида кадрлар тайёрлашда Ўзбекистон билан ҳамкорлик қилади
Япониянинг оммабоп "Nikkei Shimbun" газетасида ва нашр сайтида Ўзбекистон элчи Муҳсинхўжа Абдурахмонов ва "Daito Trust Construction" корпорацияси президенти Кеи Такэучи ўртасида кечган учрашувга бағишланган мақола эълон қилинди, деб хабар қилмоқда "Дунё" АА мухбири.
"Учрашувда "Daito Trust Construction" корпорациясининг Ўзбекистон билан қурилиш, архитектура, инвестиция соҳаларида лойиҳаларни амалга ошириш, қурилиш-архитектура лойиҳаларига япон технологиялари ва инвестицияларини олиб кириш, ҳамда қурилиш-архитектура ва муҳандислик соҳаларида мамлакатимизда юқори малакали кадрларни тайёрлаш ва уларни япон корпорациясида малакасини ошириш, стажировкалар ташкил этиш ва ишга жойлаштириш масалалари муҳокама қилинди", – дейилади мақолада.
Нашр жорий йилдан бошлаб "Daito Trust Construction» қурилиш соҳасида хорижлик ишчиларни ёллашни бошлашини ёзган. Дастлаб, компания Ўзбекистондаги давлат университетларида таҳсил олган ўнга яқин малакали ишчиларни қабул қилишни режалаштирган. Улар учун маҳаллий ходимларга яратилгани каби бир хил меҳнат шароитлари яратилади.
"Жорий йилнинг сентябрь ойида компания Ўзбекистонда номзодлар билан суҳбат ўтказишни режалаштирган. Японияга келгач, ўзбекистонлик ишчилар олти ой муддат япон тилини ўрганади ва шу вақт ичида компания мамлакатимиз ҳаётига мослашиш учун зарур ёрдамни кўрсатади. 2025 йилнинг апрель ойидан бошлаб улар япониялик маҳаллий ходимлар каби ўқув дастурларида иштирок эта бошлайди. "Daito Trust Construction" компанияси сўнги 10 йил ичида Жануби-Шарқий Осиё давлатларидан кўплаб техник стажёрларни қабул қилган бўлсада, бу гал мазкур компания тарихида илк маротаба чет эллик ишчиларни тўлиқ кунлик ишчи сифатида айнан Ўзбекистондан қабул қилишни режалаштирган", – деб хабар қилинган мақолада.
Маълум қилинишича, ўзбекистонлик ишчилар уй-жой билан таъминланади. Улар компаниянинг Токиодаги филиалларида қурувчи-уста сифатида ишлайди. Ўзбекистон вакилларининг асосий вазифаси тўрт йил ичида давлат қурилиш муҳандислиги ва архитектураси йўналишида 1-даражали малакали ишчи мақомини олишдир.
Мақола якунида "Компанияси президенти Кеи Такэучи Ўзбекистон элчихонасида кечган музокараларни илиқ руҳда ва самарали бўлиб ўтганини таъкидлади. У, шунингдек, ўзбекистонлик ишчиларга юқори ойлик маош ҳамда қулай иш шароитини таъминлаш орқали Япониянинг иккинчи ватан сифатида қадрли маконга айлантириш ниятида эканлигини ва Ўзбекистон томони билан келгусида катта истиқболли лойиҳаларни амалга оширишга содиқлигини билдирди", – деб ёзилган.
