Хитой компаниялари "Амазон" учун таҳдидми?
"Амазон" компаниясининг онлайн савдода бошқа рақобатчиларидан асосий афзаллиги - маҳсулотларни тез етказиб беришида. Баъзи товарларни эрталаб сотиб олсангиз, ўша куннинг ўзида кечгача олишингиз мумкин. Аксариятини бир кун ичига етказиб беришади
Аммо бу бизнес модели ҳар доим ҳам мижозларни ўзига жалб қилишнинг энг самарали йўли бўла олмаслиги кўриниб қолди. "Шеин", "Тему" каби Хитой компаниялари сўнгги 1-2 йил ичида АҚШ бозорига жадал кириб келди. Улар маркетингга жуда катта пул сарфлаб, АҚШда аллақачон миллионлаб мижозларни ўзига жалб қила олди
Бу янги ўйинчиларнинг асосий афзаллиги нимада? Улар буюртмаларни Хитойдан тўғридан-тўғри харидорга жўнатади. Кўп сотиладиган товарларни Хитойдаги аэропортларга яқин юк омборларига йиғишади. Буюртма тушиши билан уларни самолёт орқали тўғридан-тўғри мижознинг манзилига юборишади
АҚШда 800 долларгача бўлган импорт товарлар бождан озод қилингани боис, бу жўнатмаларнинг деярли барчаси ҳеч қандай божсиз кириб келади.
АҚШда юк омборлари ва логистика марказлари бўлмагани учун, "Тему", "Шеин" каби компанияларнинг "Амазон" каби катта харажатлари йўқ. Тўғридан-тўғри Хитойдан жўнатиш анча арзонга тушади.
Ягона камчилик - товар етиб келиши учун 1-2 ҳафта вақт кетади. "Амазон" товарлари қимматроқ, лекин 1-2 кунда етиб келади; чунки маҳсулотлар АҚШнинг ўзидаги юк марказларидан жўнатилади.
"Амазон" ана шу устунлиги туфайли ҳеч қачон арзон, лекин кеч етиб келадиган товарларни таклиф қилаётган Хитой компанияларга бозордаги улушини бериб қўймаслигига ишонаётган эди. Аммо сўнгги ўзгаришлар уни хавотра солаётгани билиниб қолди
"Амазон' яқинда Хитойдан тўғридан-тўғри товар жўнатиш хизмати йўлга қўйилишини эълон қилди: нархлар арзон бўлади, фақат буюртмани олиш учун 1-2 ҳафта кутиш керак. Бу Хитой компаниялари таклиф қилаётган бизнес модели билан бир хил. Бу хизмат "Амазон"нинг одатдаги таклифига қўшимча бўлади. Яъни, етиб келиши узоқ вақт олса ҳам, арзонроқ маҳсулот олишни истаганлар шу йўл билан буюртма қилишлари мумкин
Бу хизмат ўзини қанчалик оқлайди; Хитой компаниялари билан рақобатга қанчалик таъсир қилади; буни энди вақт кўрсатади.
"Амазон"нинг бу эълони АҚШ бозоридаги "Тему" ва "Шеин"ни саросимага солиши аниқ. Лекин Хитой сайтлари таклиф қилаётган ранг-баранг ва арзон товарларни "Амазон" қанчалик таклиф қила олади? Менимча, асосий масала шунда.
