Хитой билан пахтачилик йўналишида илмий тадқиқотлар олиб борилади
![Хитой билан пахтачилик йўналишида илмий тадқиқотлар олиб борилади Хитой билан пахтачилик йўналишида илмий тадқиқотлар олиб борилади](/photos/news/Py3BOrBGPFcAtgb.jpeg)
Бугун Қишлоқ хўжалиги вазири Иброҳим Абдураҳмонов Хитой Халқ Республикасининг “БГИ Гроуп” компанияси директори Йин Ени қабул қилди.
Самимий руҳда бошланган мулоқотда амалдаги кенг қамровли ҳамкорлик лойиҳаларининг жорий ҳолати ва амалга оширилаётган инвестицион лойиҳалар эътироф этилди.
Бинобарин, икки давлат ўртасидаги қишлоқ хўжалиги маҳсулотлари экспорти йўналишида Хитойдан олинган фитосанитария рухсатномалар сони 22 тага етказилгани, доимий равишда желатин, чорва озуқаси, ипак хомашёси, жун, асал ва асал маҳсулотлари, ичак маҳсулотлари, парранда гўшти экспорти амалга ошириб келинаётгани таъкидлаб ўтилди.
Ўз навбатида, Хитойнинг пахтачиликда илғор саналган 15 дан ортиқ компанияларидан 1 минг 738 тонна уруғлик чигит олиб келиниб парваришланаётгани ва илмий асосланган тавсиялар ишлаб чиқиш учун экиш жараёнига хорижий мутахассислар жалб қилингани ҳақида сўз юритилди.
Учрашувда ушбу йўналишдаги ҳамкорликни янада кенгайтириш, биргаликда пахта геномикаси бўйича ҳам илмий изланишлар олиб бориш бўйича бир қанча таклифлар ўртага ташланиб, бу борада амалий ишларни бошлашга келишиб олинди.