Хитой Африкани қарз тузоғига туширяптими?
Хитой Африкани қарз тузоғига туширмаяпти, дейди Жанубий Африка президенти.
Жанубий Африка президенти Кирил Рамафоса пайшанба куни Хитойнинг Африкага киритаётган сармоялари қитъани «қарз тузоғига» тушираётганига ишонмаслигини, аксинча ўзаро манфаатли муносабатларнинг бир қисми эканлигини айтди.
Рамафоса бу ҳафта Пекинда 50 дан ортиқ Африка давлатларидан делегатлар йиғилган Хитой-Африка саммити чоғида шундай баёнот берди.
«Хитой (инвестиция киритганда) охир-оқибат, бу мамлакатлар қарз тузоғига ёки қарз инқирозига тушиб қолишини таъминлаш ниятида деган тушунчани ҳар доим ҳам қабул қилмайман», деди Рамафоса Африка учун $51 миллиардлик янги молиялаштириш ҳақида журналистлар томонидан сўралганда.
Хитой уч йил давомида молиявий кўмакдан ташқари, сўнгги йилларда Хитой, Европа ва Қўшма Штатлар каби глобал кучлар ўртасидаги шиддатли геосиёсий рақобат марказига айланган ресурсларга бой Африка бўйлаб уч баробар кўп инфратузилма лойиҳаларини амалга оширишга ваъда берди.
Тафсилотларни келтирмасдан, Рамафоса, шунингдек, Жанубий Африка Хитой билан энергия хавфсизлиги жиҳатлари бўйича келишувга эришганини айтди. Унинг айтишича, Жанубий Африка энергетика соҳасини ислоҳ қилишда Хитойдан сабоқ олиши мумкин.
«Улар биз қилмоқчи бўлганимизни аллақачон қилишган. Шундай қилиб, Хитойдан ўрганишимиз керак бўлган дарслар бор», деди у.
Жанубий Африкада кўп йиллар давомида электр энергиясининг узилиши иқтисодий ўсишни чеклаб қўйган.
Рамафоса, шунингдек, Жанубий Африка Хитойнинг электромобил ишлаб чиқарувчиларини, жумладан, энг йирик BYD'ни жалб қилишга интилишини айтди.
«Биз BYD билан яхши алмашинувлар олиб бордик, у Жанубий Африкага келиб сармоя киритишга катта қизиқиш билдирмоқда», деди у.
