Volkswagen Германиядаги заводларини ёпмоқчи
Режалаштирилаётган ишлаб чиқаришни ёпиш 2026 йилгача 10 млрд еврони иқтисод қилишга йўналтирилган харажатларни камайтириш дастурининг бир қисми бўлади. Компания электромобилларга ўтишда жон сақлаб қолиш учун харажатларни оптималлаштиришга қарор қилган, деб ёзмоқда TRT.
Бу қарор ишлаб чиқариш кенгашининг қаттиқ қаршилигини келтириб чиқарди, хусусан бош директор Оливер Блюм ва VWʼда катта таъсир кучига эга касаба уюшмалари ўртасида можаро келиб чиқди. Концерн раҳбарияти ишчилар билан учрашиб, қисқартиришлар нега зарур бўлаётганини тушунтиришни режалаштирмоқда.
ГФРдаги мураккаб иқтисодий вазият, Европа ва Хитойдаги янги рақобатчилар, шунингдек, немис иқтисодиёти рақобатбардошлигининг тушиши Volkswagenʼни тарихий заводларни ёпиш томон янада кенг қадам босишга мажбурламоқда, деган Блюм қисқартиришларни изоҳлаб.
Таҳлилчилар VWʼнинг Оснабрюк (Қуйи Саксония) ва Дрезден (Саксония)даги заводларини ёпиш учун потенциал номзодлар деб санаганди. Қуйи Саксония ери Volkswagenʼнинг катталиги бўйича иккинчи акционери ҳисобланади. Ҳудуд ҳокимияти VWʼнинг заводни ёпиш тўғрисидаги қарорини қўллаб-қувватлаган.
680 минг ишчи-ходимларга эга Volkswagen 1994 йилдан буён амал қилиб келаётган, 2029 йилгача ишчи ўринлар қисқартирилишининг олдини олишга қаратилган бандликни таъминлаш дастурини ҳам тугатишга мажбур эканини маълум қилган. Концерннинг маълум қилишича, барча чоралар ишлаб чиқариш кенгашида муҳокама қилинади.
Қизиғи шундаки, бозорлар VW раҳбариятининг бу қарорига ижобий реакция кўрсатган — концерн акциялари янгиликлардан сўнг 1,2 фоизга кўтарилган. Бироқ умуман олганда компания учун аҳвол ҳавас қиларли эмас: сўнгги 5 йил ичида компания акциялари ўз қийматининг учдан бир қисмини йўқотган. Бу Европадаги йирик авто ишлаб чиқарувчилар орасида энг ёмон натижа.
VW Европа, АҚШ ва Хитойда муаммоларга дучор бўлмоқда, айниқса Хитойда BYD бошчилик маҳаллий электромобил ишлаб чиқарувчилар Volkswagenʼнинг бозордаги улушларини эгаллаб олмоқда.
Volkswagenʼнинг режалари Саксония иқтисодиётини қутқаришни ваъда қилган Германия канцлери Олаф Шолцга сўнгги зарба бўлди. Авто ишлаб чиқарувчининг сиёсати Шолцнинг позицияларини янада ёмонлаштириб, ултраўнг миллатчи кучларнинг кўрсаткичларини яхшилашга хизмат қилиши мумкин.
