“Сиёсат ҳеч қачон бунчалик қизиқарли бўлмаган”
Байденнинг президентлик пойгасидан чиқишига муносабатлар
АҚШ Президенти Жо Байден 21 июль куни президентлик пойгасидан чиқишини эълон қилди. Бу ҳақда у Х (Twitter) ижтимоий тармоғидаги саҳифасида маълум қилганди. Байден Демократик партиядан вице-президент Камала Ҳаррисни президентликка номзод сифатида кўрсатишни таклиф этган.
Қуйида АҚШ президентининг ушбу қарорига кўплаб таниқли сиёсатчиларнинг муносабатини эътиборингизга ҳавола этамиз.
Дональд Трамп, АҚШ президентлигига номзод:
- Жо Байден президентликка номзод бўлишга арзимас эди ва у бу лавозимга мос келмади. Унинг атрофидагилар, айниқса, Байденнинг шифокори ва оммавий ахборот воситалари ходимлари анча кексайиб қолган давлат раҳбарининг яна президент бўлишга қодир эмаслигини жуда яхши билишган. Энди у АҚШ учун нималар қилганини кўринг. Миллионлаб мигрантлар чегарамизни ноқонуний кесиб ўтмоқда. Қамоқларда рекорд даражада террорчилар кўпайган. Қўшма Штатлар обрўси унинг даврида қуйи поғонага тушиб кетди ҳисоб, лекин энди биз у етказган зарарни тезда қоплаймиз. Американи яна буюк қиламиз!
Камала Ҳаррис, АҚШ вице-президенти:
- Президентнинг қўллаб-қувватлови мен учун шараф ва мен сайловларда бор кучимни ишга солиб, ғалаба қилишга ҳаракат қиламан. Сайлов кунига 107 кун қолди. Биз биргаликда курашамиз ва биргаликда ғалаба қозонамиз. Мен Дональд Трампни мағлуб этиш учун Демократик партия ва миллатимизни бирлаштириш йўлида қўлимдан келган барча ишни қиламан.
Майк Жонсон, вакиллар палатаси спикери:
- Америка тарихининг мисли кўрилмаган лаҳзасида биз воқеаларни реал англашимиз керак. Демократик партия сайловгача атиги 100 кун қолганда ўз номзодини олиб ташлади. Бу партия президентликка номзод сифатида танлаган 14 миллиондан ортиқ америкаликларнинг овозларини бекор қилиб, “демократия партияси”нинг аксини исботлади. Агар Жо Байден президентликка номзод бўла олмаса, дарҳол истеъфо бериши лозим.
Гэвин Ньюсом, Калифорния губернатори:
- Байден меҳнаткаш аҳоли учун қаттиқ курашган ва барча америкаликлар учун ажойиб натижаларга эришган раҳбар. У тарихда энг нуфузли ва фидойи президентлардан бири сифатида қолади.
Дмитрий Песков, Кремль матбуот котиби:
- Сайловгача ҳали тўрт ой вақт бор ва бу фурсат кўп нарса ўзгариши учун етарли. Биз энди сабр-тоқатли бўлишимиз ва олдинда нималар бўлишини диққат билан кузатиб боришимиз керак.
Дональд Туск, Польша бош вазири:
- Жаноб Президент, сиз бутун дунёни хавфсизроқ қилиш, демократия ва эркинликни кучайтириш йўлида кўплаб қийин қарорларни қабул қилдингиз. Биламан, сиз ушбу сўнгги қарорни эълон қилишда ҳам худди шундай йўл тутгансиз. Эҳтимол, бу ҳаётингиздаги энг қийин қарордир бўлгандир.
Ҳиллари Клинтон, АҚШнинг собиқ давлат котиби:
- Президент “ёнида туриш” ва вице-президент Ҳаррисни қўллаб-қувватлаш биз учун шарафдир. Биз уни қўллаб-қувватлаш учун қўлимиздан келганини қиламиз.
Барак Обама, АҚШнинг собиқ президенти:
- Жо Байден Американинг энг нуфузли президентларидан бири, шунингдек, у менинг азиз дўстим ҳам эди. Бугун у бизга яна бир бор ватанпарвар эканлигини эслатди.
Владимир Зеленский, Украина президенти:
- Сўнгги йилларда Байден томонидан эсда қоладиган кўплаб қарорлар қабул қилинди ва биз унинг бугунги қийин, аммо кучли қарорини ҳурмат қиламиз. У Украинани тарихдаги энг драматик дақиқаларда қўллаб-қувватлади ва қўллаб-қувватлашда давом этмоқда.
Эдгарс Ринкевичc, Латвия президенти:
- Сиёсат ҳеч қачон бунчалик қизиқарли бўлмаган.
Олаф Шольц, Германия канцлери:
- Дўстим Жо Байден ўз мамлакати, Европа ва бутун дунё учун кўп нарсага эришди. Унинг ёрдами билан трансатлантик ҳамкорлик янада кучайди, НАТО янада қудратли бўлди.
