Сергей Фомин Қозоғистонда чемпион бўлди

Теннис бўйича Қозоғистонда ўтган эркаклар ўртасидаги халқаро мусобақада ҳамюртимиз Сергей Фомин бош совринни қўлга киритди.

Сергей мусобақанинг илк даврасида германиялик Николас Шеллни 7:6, 6:3 ҳисобида енгган бўлса, иккинчи босқичда нейтрал теннисчи Максим Жуковни 5:7, 6:1, 6:2 ҳисобида мағлубиятга учратди. Теннисчимиз чорак финалда яна бир нейтрал спортчи Савва Полукин билан куч синашди ва уч сет давом этган баҳсда 7:6, 3:6, 7:6 ҳисобида ғалаба қозонди. Ярим финал босқичида эса С.Фомин Евгений Тюрневни (нейтрал) 3:6, 7:6, 6:4 таслим қилди.

Яккалик баҳсларнинг сўнгги ҳал қилувчи финал ўйинида Сергей Фомин нейтрал теннисчи Бекхан Атлангеровни биринчи сетда тай-брекда, иккинчи сетда эса 6:2 ҳисобида мағлуб этиб, якунда бош совринни қўлга киритди.