Қирғизистон фуқароларини Ғазодан эвакуация қилди
Қирғизистоннинг икки фуқароси Ғазо секторидан эвакуация қилинди. Бу ҳақда Қирғизистон Ташқи ишлар вазирлигига таяниб, 24.кг хабар берди.
Маълум қилинишича, улар Қирғизистон фуқароларининг ҳуқуқ ва манфаатларини ҳимоя қилиш бўйича ишлар доирасида, шунингдек, вазирликнинг биргаликдаги саъй-ҳаракатлари натижасида эвакуация қилинган. Жараёнда Саудия Арабистонидаги Қирғизистон элчихонаси ва Россиянинг Қоҳирадаги дипломатик ваколатхонаси иштирок этган.
Қирғизистон фуқароларини Ғазо секторидан муваффақиятли эвакуация қилишда кўрсатган ёрдами учун Россияга миннатдорлик билдирган.
“Ғазо сектори ҳудудини тарк этмоқчи бўлган Қирғизистон фуқароларини эвакуация қилиш бўйича ишлар давом этади”, — деган ТИВ, лекин у ерда қанча одам борлигига аниқлик киритилмаган.
