Қирғизистон давлати ва ҳукуматини вақтинча кимлар бошқариб туриши аниқ бўлди
Кеча Қирғизистон давлат раҳбари вазифасини бажарувчи, мамлакат бош вазири Садир Жапаров навбатдан ташқари президентлик сайловларида иштирок этиши муносабати билан истеъфога чиқишини эълон қилгани ҳақида хабар бергандик. У ўз номзоди кўрсатилган ҳужжатларни МСКга ҳам топшириб бўлди. Шу муносабат билан Жапаров юқоридаги ваколатларни ўзидан соқит қилди.
Энди Жогорку Кенеш спикери Талант Мамитов вақтинчалик президентлик вазифасини бажариб турса, Артём Новиков сайлов натижаларига қадар ҳукуматни бошқаради.
Маълумотларга кўра, Қирғизистонда бўлажак президент сайловида қатнашадиган номзодлар сони айни пайтгача 50 дан ошган. Аммо рўйхатга олиш жараёнлари ҳали давом этяпти.
Даъвогарлар орасидан Жапаровдан ташқари олдинги спикер Канат Исаев, парламентнинг қатор собиқ аъзолари, сиёсатчилардан ташқари блогерлар ва бошқа фуқаролик жамияти фаоллари, педагоглар, ҳуқуқшунослар, пенсионерлар, вақтинча ишсизлар ҳам жой олган.
