Жангдан қочган 25 нафар аскар ўлим жазосига ҳукм қилинди
Конго Демократик Республикасида 4 июль куни исёнчилар билан жанг қилишдан қочган 25 нафар аскар ўлим жазосига ҳукм қилинди. Бу ҳақда Reuters нашри хабар берди.
КДР ҳарбий трибунали аскарларни ўз ҳарбий бурчини адо этишдан бўйин товлаш, армиядан қочиш ва ўгрилик жиноятларида айбдор деб топиб, ўлим жазоси тайинлаш тўғрисида ҳукм чиқарган. Терговчиларга аскарлар хатти-ҳаракатларини текшириш юзасидан қўшимча топшириқлар берилган.
Манбада айтилишича, аскарлар мамлакат шарқидаги М23 исёнчи гуруҳи билан кураш пайтида жанг майдонини ташлаб қочган. Кейинчалик яқин атрофдаги маҳаллий аҳоли мулкларида ўғирлик ва талончилик ҳаракатлари содир этган.
Конго армияси сўнгги икки ойдан бери М23 исёнчиларига қарши фаол кураш олиб бормоқда. Айрим расмийлар ушбу исён мамлакатга қўшни Руанда томонидан ташкил этилганини иддао қилган.
Ҳарбий ҳаракатлар кескин нуқтага кетган Шимолий Киву вилоятида 2,7 миллион киши уй-жойларини ташлаб кетган. Вилоятнинг стратегик муҳим нуқталари қўзғолончилар томонидан эгалланган.
Жангдан қочган аскарлардан бири 10 йиллик қамоқ жазосига ҳукм қилинган. Яна бир нафар эса оқланган. Ҳарбий низомни бузишда узил-кесил айбдор деб топилган 25 кишига энг олий жазо берилган.
Конго Демократик Республикасида ўлим жазоси қонунан бекор қилинмаган. Инсон ҳуқуқларини ҳимоя қилиш ташкилотлари талаби билан ҳукумат бу турдаги жазога 2000 йилдан бошлаб мораторий киритган. Аммо бу тартиб амалда умуман ишламаган.
