Исроил гаровга олинганлар масаласида ҲАМАС билан музокара ўтказиш учун делегация юборади

Исроил ҳукумати гаровга олинганларни озод қилиш масаласида ҲАМАС билан музокара олиб бориш учун махсус делегация жўнатади. Бу ҳақда Исроил бош вазири Биньямин Нетаньяху берган баёнотга асосланиб, Reuters'га таяниб Дарё нашри хабар берди.

Манбада айтилишича, Исроил бош вазири 4 июль куни АҚШ президенти Жо Байден билан телефон мулоқотида бўлган. Унда вазир Ғазода асирликка олинганлар масаласида музокаралар тўхтаган жойидан давом этишини маълум қилган.

Исроил музокаралар гуруҳидаги исмини ошкор қилмаслик шарти билан маълумот берган манбанинг айтишича, ҲАМАС ва Исроил келишув шартларини янгилаган. Икки томон манфаатини нисбатан кенгроқ қамраб олувчи бандларнинг келишув битимига киритилиши оқибатида рақибларнинг муросага келиши реалликка айланган.

Сўнгги келишувларда Исроил томонидан ҲАМАС таклифларига нисбатан қабул қилиш кайфияти нисбатан кучайган. Бунгача Тель-Авив Ғазодаги гуруҳнинг ҳар қандай талабини кескин рад этиб келаётган эди.

Исроил вакилларининг айтишича, музокараларда Исроил делегациясига мамлакатнинг “Моссад” разведка агентлиги раҳбари етакчилик қилади. Делегация ишга киришишдан олдин мамлакат бош вазири ҳузуридаги йиғилишда қатнашиши белгиланган.

“АҚШ президенти бош вазирнинг ўз музокарачиларига АҚШ, Қатар ва Миср воситачилари билан келишувни тугатиш мақсадида мулоқот қилиш ҳуқуқини бериш ҳақидаги қарорини олқишлади”, — дейилади Исроил бош вазири идораси эълон қилган баёнотда.

Байден билан телефон суҳбатида Нетаньяху Исроил ўзининг барча мақсадларига эришгандан кейингина Ғазодаги урушини тўхтатиши ҳақидаги позициясини такрорлаган. Нетаньяхунинг ҳукмрон коалициядаги ўта ўнг қанот ҳамкорлари, агар уруш ҲАМАС йўқ қилинмай туриб тугаса, ҳукуматни тарк этишлари мумкинлигини маълум қилишган. Уларнинг коалицияни тарк этиши эса Нетаньяхунинг бош вазирлигини тугатиши мумкин.