Гандболчиларимиз жаҳон чемпионатида Португалия билан куч синашади

Шимолий Македониянинг Скопе шаҳрида гандбол бўйича хотин-қизлар жамоалари ўртасида U20 жаҳон чемпионатининг илк тур ўйинлари ортда қолди.

Йигирма тўртинчи бор ташкил этилаётган мазкур жаҳон чемпионатининг "G" гуруҳидан жой олган Ўзбекистон U20 қизлар терма жамоаси 1-турни Черногория терма жамоасига қарши ўтказади.

Шиддатли ва ўзига хос тарзда кечган ўйинда Черногория –Ўзбекистон 48:32 ҳисобида якунланди.

Энди мамлакатимиз гандболчилари 21 июнь куни ўтказиладиган 2-турда Португалия терма жамоаси билан куч синашади. Ҳамюртларимиз 22 июнь куни ўтадиган 3-турда Гвинея вакилларига қарши майдонга тушади.

Португалияликлар 19 июнь куни ўтган 1-турда Гвения терма жамоасини 32:18 ҳисобида доғда қолдирди.

Жаҳон чемпионатида 32 та жамоа қатнашаётган бўлса, «А» гуруҳидан Руминия, Бразилия, Нидерландия, Эрон, «В» гуруҳидан Швейцария, Тунис, Миср, Чили, «С» гуруҳидан Венгрия, Аргентина, Жанубий Корея, Мексика, «D» гуруҳидан Дания, Япония, Норвегия, Хитой Тайпейи, «Е» гуруҳидан Чехия, Жазоир, Швеция, Хитой, «Ғ» гуруҳидан Германия, Сербия, Франция, Испания, «Н» гуруҳидан Ангола, Исландия, Шимолий Македония, АҚШ жой олган.

Шу ўрнида бир гап. Бешта қитъанинг 32 та миллий терма жамоалари қатнашаётган жаҳон чемпионати йўлланмасини Ўзбекистон қизлар терма жамоаси жорий йил 28 февраль-3 март кунлари пойтахтимизда ташкил этилган "IHF Trophy" турнирида қўлга киритганди.

Эслатиб ўтамиз, жаҳон чемпионати мусобақалари 30 июнга қадар давом этади.