Бернар Арно дунёнинг энг бой одамига айланди

Louis Vuitton Moët Hennessy (LVMH) гуруҳи президенти Бернар Арно Forbes Real-Time миллиардерлар рейтингига кўра, Amazon асосчиси Жефф Безосни ортда қолдириб, дунёнинг энг бой одамлари рўйхатида биринчи ўринга кўтарилиб олди.

Миллиардерлар рўйхатини реал вақтда янгилаб борувчи рейтинг маълумотларига кўра, Арнонинг бойлиги бир кунда 710 млн долларга кўпайиб, умумий ҳисобда 186,3 млрд долларга етди. Безос эса 186 млрд доллар билан 2-ўринга тушди.

Шу билан бирга, Bloomberg Billionaires Index (BBI) рейтингига кўра, Арно 162 млрд доллар бойлик билан Безосдан кейин ҳамон 2-ўринни эгалламоқда. Bloomberg маълумотларига кўра, французнинг бойлиги йил бошидан бери 47,9 млрд долларга кўпайган.

Forbes рейтингига кўра, миллиардерлар рўйхатида 3-ўринни Tesla ва SpacеХ компаниялари раҳбари Илон Маск 147,3 млрд доллар билан эгалламоқда. Етакчи бешликдан Microsoft асосчиси Билл Гейтс (125,5 млрд доллар) ва Facebook асосчиси Марк Цукерберг (114,7 млрд доллар) ҳам жой олган.