Аргентина Эрон ташқи ишлар вазирини ҳибсга олишни талаб қилмоқда
Аргентина Эрон ташқи ишлар вазири Аҳмад Воҳидийни қидирувга берган ва у ташриф билан келган Покистон ва Шри-Ланка расмийларидан уни ҳибсга олишни талаб қилган. Сўров Интерпол орқали юборилган. Ҳибсга олиш эҳтимоли нолга яқин.
Собиқ мудофаа вазири ва Эрон Инқилобий гвардияси генерали, «Қудс» кучларининг хорижий операциялар бўлимига қўмондонлик қилган Аҳмад Воҳидий 1994 йилда Буэнос-Айресдаги ҳужумга алоқадор бўлган. Ўшанда террорчилар Аргентина пойтахтидаги яҳудийлар марказини портлатиб, 85 кишини ўлдирган, яна 300 га яқин киши жароҳат олган.
Икки йил олдин, 1992 йилда террорчилар Исроилнинг Буэнос-Айресдаги элчихонаси яқинида бомба ўрнатилган автомобилни портлатиб юборишган. Бино вайрон бўлган, 29 киши ҳалок бўлган ва яна 242 киши яраланган. Портлаш учун жавобгарликни Ливан Ҳизбуллоҳи зиммасига олди. Исроил Аргентинани Эрон разведка хизматларининг ҳар иккала терактда иштирок этгани ҳақида хабардор қилди, бироқ Аргентина расмийлари узоқ вақт давомида ҳаракатсизлигича қолди.
2024 йил апрелида Аргентина суди терактлар нафақат Исроил ва яҳудийларга, балки Аргентинага қарши ҳам қаратилган деб қарор қилди – Эрон ядровий соҳадаги ҳамкорликни тўхтатгани учун қасос олмоқда.
Бу иш билан боғлиқ яна бир фожиани эслатиб ўтаман. 2015 йилда, Аргентина президенти Кристина Кирчнер Эрон билан терговни тўхтатиш учун тил бириктирганлиги ҳақидаги хабар чоп этилишидан бир неча соат олдин прокурор Алберто Нисман ўлик ҳолда топилган эди. Аввалига ўлим ўз жонига қасд қилиш деб топилган, аммо кейин тергов уни ўлдирилган деган хулосага келган.
