Хорижда ўқиётган талабалар бўйича Ўзбекистон ТОП- 5 таликка кирди

ЮНEСКО хорижда таҳсил олаётган талабалар бўйича 2021 йилдаги ҳисоботини тақдим қилди.

Унга кўра, 2021 йил давомида хитойлик ва ҳиндистонлик талабалар хорижга ўқишга кетиш бўйича етакчилик қилган. Бунга мазкур давлатлардаги аҳолининг кўплиги ва ўқишга бўлган талабнинг юқорилиги сабаб бўлиши мумкин.

Маълумотга кўра, 2021 йилда 1 млн. нафардан ортиқ хитойлик талаба чет элда таҳсил олган бўлса, шу рақамларнинг қарийб тенг яримича бўлган ҳиндистонликлар ҳам хорижда ўз илмий изланишларини давом эттирган.

Ёшлари хорижда энг кўп ўқиётган давлатлар ичида Вьетнам 3-ўринни эгаллаган.

Шунингдек, Ўзбекистон ҳам талабалари энг кўп хорижда ўқийдиган давлатлар қаторидан ўрин олган. Мамлакатимиз 2021 йилги статистикада 5-ўринни олган бўлиб, ўша йилги ҳисоб-китобга кўра, 100 минг нафардан ортиқ ўзбекистонлик талаба хорижда таҳсил олишда давом этган.

Маълумот ўрнида, энг кўп талабани ўз бағрида жамлаган давлат АҚШ бўлган. Бу давлатга 2021 йилда 833 минг нафар хориж талабаси ўқиш учун борган.

601 минг нафар талабани бағрига олган Буюк Британия эса 2-ўринни эгаллаган.

Ҳисоботда ёзилишича, йилдан йилга талабаларнинг хорижда ўқишга бўлган талаби ортиб бормоқда. Масалан, 2001 йилда дунё бўйича 2,2 млн. нафар талаба чет давлатларга ўқиш учун борган бўлса, 2021 йилда бу сонлар 6,39 млн. ни ташкил қилган.