Бразилияда кучли ёмғир сабаб сув тошқини қурбонлари сони 107 нафарга етди

Фуқаро мудофааси бошқармаси маълумотларига кўра, яна 136 киши бедарак йўқолганлар рўйхатида.

Ўтган ҳафта мамлакат жанубидаги Рио-Гранде-ду-Сул штатида катта ҳажмдаги ёмғир ёғди.

374 жабрланувчи давлат шифохоналарига етказилган, қидирув-қутқарув ишлари давом этмоқда.

Маҳаллий матбуотнинг ёзишича, минглаб одамлар ҳалигача электр ва интернетсиз. Қурбонлар сони ортиб бориши мумкинлигидан хавотирлар бор.

3 май куни штат губернатори Эдуардо Леите 180 кунлик фавқулодда ҳолат эълон қилди.

«Биз жуда фавқулодда вазиятни бошдан кечирмоқдамиз. Бу танқидий воқеа эмас, балки штат тарихидаги энг ҳалокатли воқеа», - деди губернатор.

Табиий офат ҳудудига икки марта ташриф буюрган Бразилия президенти Луиз Инациу Лула да Силва расмийлар минтақани қайта тиклашга ваъда берди.