Буэнос-Айресда ҳаёт тўхтаб қолди: Аргентинада оммавий иш ташлаш бошланди

Инфляция 288 фоизга кўтарилди, маошлар бутунлай тушиб кетди. Аргентинада барча касаба уюшмалари умумий иш ташлашмоқда.

Аргентинада касаба уюшмалари либертар президент Милейга қарши яна бир бор иш ташлашди.
Аргентинада касаба уюшмалари янги либертар президент Хавер Милейнинг кескин тежамкорлик чоралари ва режалаштирилган ислоҳотларига қарши оммавий иш ташлашни бошлади. Милей томонидан молия бозорларини мувозанатлаш учун қилинган қадамлар ижобий натижалар берган бўлсада, улар реал иқтисодиётни катта қийинчиликка дучор қилди.
Жанубий Америка давлатида 24 соат давом этган иш ташлаш билан жамоат транспорти, муҳим донни қайта ишлаш сектори, супермаркетлар, аэропортлар ва банклар каби соҳалардаги фаолиятлар тўхтади. Ҳукуматга қарши норозилик намойишига энг йирик касаба уюшмалари қўшилиши билан кўплаб шаҳарларда, хусусан, Буэнос-Айресда ҳаёт тўхтаб қолди.
Аргентинадаги кўп йиллик нотинчликлардан сўнг ҳамон кўпчилик Милейнинг режаларини қўллаб-қувватламоқда. Бироқ, унинг бозорга йўналтирилган позицияси ва қаттиқ тежамкорлик сиёсати одамларнинг реал даромадларини пасайтирди, аллақачон юқори бўлган қашшоқлик даражасини оширди ва йил бошида иқтисодий фаолликнинг пасайишига олиб келди.

Иш ташлаш рейсларнинг тўхтатилишига, портлар фалаж бўлишига ва мактаб ва университетларда ишламай қолишига олиб келди. Банклар иш ташлашда иштирок этиши сабабли бозорларда фаоллик пасайди. Ҳукумат иш ташлашни адолатсиз деб танқид қилган бўлсада, Буэнос-Айреснинг сокин кўчаларида ишламоқчи бўлган одамларнинг иш ташлашдан таъсирлангани кўринди.