«Vatanparvar» tashkilotining yana bir zamonaviy avtodromi foydalanishga topshirildi

O‘zbekiston Respublikasi mudofaasiga ko‘maklashuvchi «Vatanparvar» tashkiloti Qashqadaryo viloyati kengashi tasarrufidagi Shahrisabz avtomobil maktabining zamonaviy talablarga mos ravishda bunyod etilgan avtodromining ochilish marosimi bo‘lib o‘tdi.

Tantanali marosimda «Vatanparvar» tashkiloti Markaziy kengashi raisi Husan Botirov, IIV JXD Yo‘l harakati xavfsizligi xizmati boshlig‘i Sherzod Ibragimov, Shahrisabz shahri hokimligi mutasaddilari va keng jamoatchilik vakillari ishtirok etdilar.

Tadbirda so‘zga chiqqan Husan Botirov mazkur ob’ekt yaqinlashib kelayotgan davlatimiz mustaqilligining o‘ttiz uch yillik bayrami munosabati bilan shahrisabzliklar uchun «Vatanparvar» tashkilotining sovg‘asi ekanligini, endilikda ushbu o‘quv avtodromida haydovchilikning barcha toifalari bo‘yicha o‘qitilayotgan fuqarolar doimiy ravishda amaliy mashg‘ulotlarni o‘tashlari mumkinligini bildirdi.

Sherzod Ibragimov o‘z nutqida «Vatanparvar» tashkilotining avtomototransport vositalari haydovchilarini tayyorlash kurslarida tahsil oladigan har bir fuqaro professional haydovchi va xavfsiz yo‘l harakati ishtirokchisi bo‘lib yetishishiga umid bildirdi.

Tashrif buyuruvchilar uchun, shuningdek, zamonaviy innovasion texnologiyalar bilan jihozlangan Shahrisabz avtomobil maktabi binosida ekskursiya uyushtirildi.
Tadbir davomida tashkilotning Qashqadaryo viloyati kengashi raisi Otamurod Elomonovga Yo‘l harakati xavfsizligi xizmati boshlig‘i SH.Ibragimov tomonidan Shahrisabz avtomobil maktabining faoliyati uchun lisenziya tantanali ravishda topshirildi.