Radioboshlovchi Ekvadorning yangi vise-prezidenti bo‘ldi
Guayakillik radioboshlovchi va iqtisodchi Otto Sonnexolsner Ekvador vise-prezidentligiga tayinlandi. Shu haqdagi qaror mamlakat Milliy assambleyasi (bir palatali parlament) majlisida qabul qilingan, deb yozadi «TASS».
Ekvador qonunchiligiga ko‘ra, vise-prezident lavozimi qaysidir sabab bilan bo‘sh qolsa, mamlakat rahbari 15 kun davomida 3 ta nomzod ro‘yxatini shakllantirib, parlamentga yuborishi lozim.
Otto Sonnexolsner 94 ta ovoz olib, mamlakatning konstitusiyaviy vise-prezidenti etib tayinlangan va shu zahoti o‘z vazifasiga kirishgan. U 2021 yilgacha vise-prezidentlik lavozimida bo‘ladi.
Eslatib o‘tamiz, dekabr oyining boshida Ekvador Prezidenti Lenin Moreno Mariya Aleksandra Vikunyani mamlakat vise-prezidentligi lavozimidan ozod qilgan edi. Ayni vaqtda Ekvador prokuraturasi sobiq vise-prezidentga nisbatan dastlabki tergov harakatlarini boshlagan. Mariya Aleksandra Vikunya korrupsiyada gumon qilinmoqda.
Manba: daryo.uz
