Gruziya parlamenti xorijiy agentlar to‘g‘risidagi qonun loyihasini uchinchi o‘qishda ma’qulladi

Gruziya parlamentining huquqiy masalalar bo‘yicha qo‘mitasi xorijiy agentlar to‘g‘risidagi qonun loyihasini uchinchi va yakuniy o‘qishda ma’qulladi. Qo‘mita yig‘ilishi qonun chiqaruvchi organ saytida to‘g‘ridan-to‘g‘ri translyasiya qilindi, deb xabar beradi TASS.

Ma’ruzachi qo‘mita rahbari Anri Oxanashvili edi. Nizomga ko‘ra, uchinchi o‘qishda qonun loyihasiga tahririy o‘zgartirishlar kiritish ko‘zda tutilgan. Hech kim tahririy fikrga ega emas edi. Loyiha uchinchi o‘qishda yalpi yig‘ilishga yuborildi.

Chet el agentlari haqidagi qonun loyihasiga qarshi namoyishchilar yakshanba kunidan beri navbatdagi namoyishni o‘tkazmoqda. 13 may kuni ertalab ular Rustaveli prospektidagi parlamentga borib, deputatlar tashabbusni huquqiy masalalar bo‘yicha qo‘mita yig‘ilishida uchinchi o‘qishda ko‘rib chiqmasligi uchun o‘sha yerda tunab qolishdi. Dushanba kuni erta tongda polisiya namoyishchilarni parlamentga kirishdan uzoqlashtirgan.

1 may kuni Gruziya parlamenti “Chet el ta’sirining ochiqligi to‘g‘risida”gi qonun loyihasini ikkinchi o‘qishda ma’qulladi. Prezident Salome Zurabishvili, muxolifat va G‘arb diplomatlari buni respublikaning Yevropa Ittifoqiga integrasiyalashuviga to‘siq, deb hisoblab, bunga qarshi chiqdi. Shuningdek, Zurabishvili qonun loyihasi uch o‘qishda ham qabul qilingan taqdirda veto qo‘yishini ma’lum qildi.

15 apreldan beri muxolifat va fuqarolik faollari Tbilisida xorijiy agentlar haqidagi qonun qabul qilinishiga qarshi namoyishlar o‘tkazmoqda. Namoyishlar bir necha bor xavfsizlik kuchlari bilan to‘qnashuvlarga sabab bo‘lgan.