Buxoroda 77 yoshli shifokor g‘ayriqonuniy tarzda ozodlikdan mahrum etildi. Bu hukmni chiqargan sudyaga chora ko‘riladimi?
Sud hujjatlarida keltirilishicha, Vobkent tuman prokurori 45 yillik ish stajiga ega shifokorni 5 yil muddatga ozodlikdan mahrum qilishni so‘ragan. Sud 80 yoshni qoralay deb qolgan qariyani 2 yilga ozodlikdan mahrum qilgan. Tergov ham, birinchi instansiya sudi ham qilmishni noto‘g‘ri malakalagan.
2022 yil 21 oktyabr kuni Buxoro viloyati Vobkent tuman tibbiyot birlashmasi tug‘uruqxona bo‘limiga 36,4 haftalik homiladorlik tashxisi bilan murojaat qilgan G.H.da, kesarcha kesish amaliyotini o‘tkazish zaruriyati bo‘lmasa-da, shifokor Shamsiddin Hamrayev jarrohlik amaliyotini o‘tkazgan. Shifokor tomonidan zarur intensiv antibakterial davo choralari qilinmagani hamda dinamik kuzatuvlar lozim darajada olib borilmagani sababli bemor G.H. bachadon ichi va butun bachadon yallig‘lanishi oqibatida og‘ir tan jarohati olgan.
Holat yuzasidan jinoyat ishi qo‘zg‘atilib, tergov harakatlari olib borilgan va Shamsiddin Hamrayevga Jinoyat kodeksining 116-moddasi 4-qismi “b” bandi bilan ayblov e’lon qilingan.
Sudya Akrom Rahimovdan ko‘r-ko‘rona va g‘ayriqonuniy hukm
Jinoyat ishlari bo‘yicha Vobkent tuman sudyasi Akrom Rahimov ish tafsilotlarini to‘liq o‘rganib chiqmagan hamda ayblov asosli yoki asossiz qo‘yilganini tekshirib ko‘rmagan. U qilmish qanday malakalanganiga huquqiy baho bermagan holda shifokorni tergov qaysi modda bilan ayblagan bo‘lsa, shu modda bilan hukm o‘qib, Shamsiddin Hamrayevga 2 yil muddatga ozodlikdan mahrum etish jazosini tayinlagan. Hukm e’lon qilingach, shifokor darhol sud zalidan qamoqqa olingan.
