Трампга ҳужумда гумонланаётган шахс Украинани фаол қўллаб-қувватлаган

Трампга ҳужумда гумонланаётган шахс Украинани фаол қўллаб-қувватлаган. У Украина Қуролли Кучларига афғон ҳарбийларини ёллашга уринганини айтди. Бу ҳақда The New York Times хабар берди.

"АҚШнинг собиқ президенти Доналд Трампга суиқасд уюштирилганидан кейин ҳибсга олинган 58 ёшли Райан Уэсли Рут Х ижтимоий тармоғида Украина армиясига кўнгилли сифатида қўшилишга тайёрлигини билдирган", деб ёзади The New York Times. Шунингдек, у Signal мессенжерида “Тинч аҳоли бу урушни ўзгартириши ва келажакдаги урушларнинг олдини олишлари керак” деб ёзган.

Ўтган йили бу шахс New York Times нашрига америкаликлар Украина армиясига кўнгилли сифатида ёрдам бераётгани ҳақидаги мақола учун интервью берган эди. Рут интервьюда "Россия Федерацияси кенг миқёсли босқин бошлаганидан кейин Украинага борганини, шунингдек, Толибондан қочган афғон аскарларини Украина Қуролли кучлари таркибида урушда қатнашиш учун ёллашга ҳаракат қилганини" айтган. Қайд этилишича, Рут уларни Покистон ва Эрондан Украинага ноқонуний олиб ўтишни режалаштирган.