Шахмат: Уэсли билан дуранг ўйнаган Нодирбек энди Богдан-Даньел Дяк билан беллашади

Бугун, 4 июль куни Руминия пойтахти Бухарест шаҳрида ўтаётган "Superbet Chess Classic Romania" турнирининг 8-турида Нодирбек Абдусатторов руминиялик Богдан-Даньел Дяк билан оқ доналарда куч синашади.

Кеча ўтказилган 7-турда Нодирбек Абдусатторов қора доналарда Уэсли Со билан баҳс олиб борди.

Айтиш лозим, ушбу турдаги барча ўйинлар дуранг билан якунланди. Уэсли Со - Нодирбек Абдусатторов “дуэли”да ҳамюртимиз қора доналарда ўйнаган бўлса-да 68-юриш ҳолатидан ҳужумкор позицияда ҳаракатланиши ғалаба йўлини очиши мумкин эди.

Аммо америкалик шахматчининг эҳтиёткорлик билан амалга оширган позицион ҳимояланиши баҳснинг 76-дона суриш ҳолатида деярли дурангни қайд этди. Шундай бўлса-да, томонлар 86-юришдан кейин муросага келди.

Дуранг натижалардан сўнг турнир жадвалида шахматчиларнинг жойлашувида ўзгариш рўй бермади.

Мусобақа жадвалини АҚШлик Фабиано Каруана 4,5 очко билан бошқараётган бўлса, кейинги ўринлардан жой олган Доммаражу Гукеш, Алиризо Фирузжа ва Рамешбабу Праггнанандҳа 4 очкога эга бўлиб турибди. Нодирбек Абдусатторов 3 очко билан 7-ўринда бормоқда.

"Grand Chess Tour" сериясига киритилган биринчи нуфузли мусобақа – "Superbet Chess Classic Romania" турнирининг мукофот жамғармаси 350 минг АҚШ долларидан иборат бўлиб, 1-ўринни эгаллаган шахматчи 100 минг, 2-ўрин 65 минг, 3-ўрин 48 минг, 3-ўрин 48 минг, 4-ўрин 32 минг, 5-ўрин 26 минг, 6-ўрин 21 минг, 7-ўрин 18 минг 500, 8-ўрин 16 минг, 9-ўрин 13 минг ва 10-поғонадан жой олган шахматчи 10 минг 500 АҚШ доллари билан тақдирланади.

Турнирнинг сўнгги 9-тур ўйинлари эртага, 5 июль куни бўлиб ўтади.