Шахмат: Самарқандда ўтадиган жаҳон чемпионатида кимлар иштирок этади?

Жорий йил декабрь ойининг сўнгги кунларида дунё тамаддунига улкан ҳисса қўшган қадимий ва ҳамиша навқирон Самарқандда шахматнинг тезкор ва блиц йўналишлари бўйича ФИДE жаҳон чемпионати бўлиб ўтади.

Дунёнинг энг кучли шахматчиларини жамлайдиган чемпионатда кимлар иштирок этиши, иштирокчиларнинг рўйхатдан ўтишининг сўнгги кунлари этиб қайси саналар белгиланганлиги ҳамда Қатнашчиларнинг якуний рўйхати қачон эълон қилиниши борасидаги сўровлар натижасида куни кеча Халқаро шахмат федерацияси мазкур мусобақа тафсилотлари хусусида айрим маълумотларни чоп этди.

Унга кўра, бугунгача Самарқандда ўтадиган жаҳон чемпионатида ўз омадини синаб кўриш учун тезкор(рапид) ва блиц бўйича амалдаги жаҳон чемпиони Магнус Карлсен (Норвегия), шунингдек, Гукеш Доммараджу (Ҳиндистон), Винсент Кеймер (Германия), Шахриёр Мамедяров (Озарбайжон), Ян-Кшиштоф Дуда (Польша), Ю Янги (Хитой), Левон Аронян (АҚШ), Максим Вашиер-Лаграве (Франция), Даниил Дубов (ФИДE), Нодирбек Абдусатторов (Ўзбекистон) эркаклар ўртасидаги баҳсларда қатнашиш истагини билдирган.

Жаҳон чемпионатининг аёллар гуруҳида Цзюй Вэньцзюнь (Хитой), Тан Жунъи (Хитой) ва Бибисара Асаубаева (Қозоғистон), Александра Горячкина (ФИДЕ), Катерина Лагно (ФИДЕ), Ҳумпй Конеру (Ҳиндистон), Ҳарика Дронавалли (Ҳиндистон), Александра Костениук (Швейцария) иштирокчилар қайдномасини тўлдирган.

Жорий йилнинг 25-31 декабрь кунлари ўтадиган Самарқанд мусобақаларининг кун тартибига биноан 25 декабрда жаҳон чемпионатининг очилиш маросими, 26-28 декабрь кунлари тезкор(рапид) мусобақалар, 29-30 декабрда эса блиц баҳслари ва ёпилиш маросими ташкил этилади.

Халқаро шахмат федерацияси 11 декабрни иштирокчиларни рўйхатга олишнинг охирги санаси эканлигини эълон қилди.